“Быйыл Тиксиигэ тыал күүһүнэн үлэлиир дизельнэй комплекс тутуута саҕаланар”, — диэн “Якутия24” телеханаалга интервьютугар өрөспүүбүлүкэ бырабыыталыстыбатын бэрэссэдээтэлин солбуйааччы Алексей Колодезников иһитиннэрдэ.
Кини этэринэн, олунньу ый бүтүүтэ Саха сирин баһылыга Егор Борисов, “РусГидро” ПАУо генеральнай дириэктэрэ Николай Шульгинов, Саҥа энергетика уонна бырамыысыланнай технологиялары сайыннарыыга тэрилтэтин толорооччу дириэктэрэ Такаши Омоте, толорооччу дириэктэр Такаока Токо Фукуо уонна “Якутскэнерго” генеральнай дириэктэрэ Александр Слоик бииргэ үлэлиир туһунан Меморандумҥа илии баттаабыттара.
Маннык бырайыакка маарынныыр Россияҕа суох. Дойдуга аан бастаан биир кэлимсэ технологическай ситимҥэ уопсайа 900 кВт кыамталаах тыал күүһүнэн үлэлиир установкалар, 3 МВт кыамталаах дизель-генератордар уонна уоту түмэр тиһик холбоһуохтара. Бу бырайыак Россия уонна Япония бииргэ үлэлээһиннэрин тупсарыаҕа. Тыал күүһүнэн энергияны биэрэр установкалар айылҕа уустук усулуобуйатыгар сөп түбэһэллэр.
Алексей Колодезников этэринэн, Япония NEDO хампаанньата бары наадалаах оборудованиены босхо биэриэҕэ. Бу тэриллэри Владивосток пордугар диэри аҕалан биэриэхтэрэ.
Комплексы “Сахаэнерго” АУо үлэлэтиэҕэ.
