Уочараттаах ыҥырыы хампаанньата алтынньы 1 күнүттэн ахсынньы 31 күнүгэр диэри салҕаныаҕа. Байыаннай сулууспаҕа 128 тыһыынча киһи барара былааннанар. Бу сааскы хомууртан сэттэ тыһыынча киһинэн аҕыйах, суруйар «Парламентская газета».
Сокуон быһыытынан, байыаннай сулууспаҕа 18 — 27 саастаахтар ыҥыраллаллар, байыаннай учуокка турааччылар итиэннэ байыаннай учуокка турар эбээһинэстээх эрээри, бэлиэтэммэтэхтэр, итиэннэ саппааска сылдьар буолбатах дьон ыҥырыллаллар.
Тыа сиригэр олорор гражданнар, өскөтүн кинилэр күһүҥҥү хомуурга үлэлиир буоллахтарына, призывтар алтынньы 15 күнүттэн саҕаланар. Оттон Уһук Хоту оройуоттар уонна онно тэҥнээх территорияларга олорор биирдиилээн дьон — сэтинньи 1 күнүттэн ыҥырыллаллар.
РФ БК генеральнай штабын кылаабынай тэрийэр-хомуйар управлениетын начальнига генерал-полковник Евгений Бурдинскай эппитинэн, күһүҥҥү хомуур «сааскы уопутунан, коронавирус ыарыыта сэбилиниилээх күүстэргэ киирбэтин курдук миэрэлэри учуоттаан ыытыллар».
Холобур, байыаннай комиссариаттарга призывник сотрудниктары кытта алтыспат. COVID-19 туттарбыт анаалыһа үчүгэй эрэ буоллаҕына биирдэ медицинскэй көрүүгэ барар, профессиональный психологическай талыыны ааһар, байыаннай таҥаһын ылар.
Өскөтүн хамаандаҕа биир эмэ анаалыс «положительнайы» көрдөрдөҕүнэ — тута барыларын муниципальнай тэриллиилэригэр эмтэниигэ ыыталлар.
