Саха сиринээҕи Роспотребнадзор управлениетын салайааччытын э.т. Изабелла Самойлова СИА-ҕа куоракка оҕолор ортолоругар энтеровируһунан сүһүрүү элбээбитин туһунан кэпсээтэ.
«Маныаха быһыы-майгы уларыйа турар. 38-с уонна 17-с №-дээх оскуолаларга оҕолор менингиттээбит түгэннэрэ тахсыбыта. Кинилэр үтүөрэн билигин үөрэнэ сылдьаллар. 5-с оскуолаҕа оҕолор ыалдьаллар. Маны кыраҕытык хонтуруоллуубут», — диир Изабелла Самойлова.
«Билигин киэҥник кэпсэтэр серознай менингит ыарыыта суох. Хас да ыарыы сибикитэ холбоһуохтарын сөп. Онно олоҕуран чопчу диагноһы быраастар туруораллар. Серознай менингит аһара тарҕанна диир, син биир тумуу аһара элбээтэ диэн курдук», — диир кини.
ЭВИ (энтеровируснай инфекция) киһиэхэ араастаан киирэр. Ол курдук, фарингит, герпангин, стоматит, ымынах курдук буолуон, төбө, былчыҥ ыалдьыан сөп. Маннык сибикилэр баар буоллулар эрэ оҕо элбэх киһи сылдьар сириттэн туоратыллыахтаах уонна эмтэниэхтээх.
ЭВИ ыалдьыбыттар сороҕор ыарыыны билиннэрбэттэр. Көннөрү тумуу, вирус инфекциятын курдук саҕаланыан сөп.
«30-с №-дээх оскуолаҕа ыалдьыбыт оҕолор үтүөрдүлэр. Ол гынан баран бастакы кылаастар билигин да карантиҥҥа олороллор. Бүгүҥҥү ааҕыынан куоракка 15 киһи ыарыйда, онтон 7-тэ биир оскуолаҕа үөрэнэллэр. Сыл устатыгар 80 киһи маннык ыалдьыбыта биллэр», —диэтэ Самойлова.
ЭВИ тарҕамматын туһугар маннык сүбэлэри тутуһуҥ:
- Ыарыы кыра да сибикитэ баар буоллаҕына, оҕолору оскуолаҕа, оҕо саадыгар ыытымаҥ.
- Ыарыы саҥа саҕаланан эрдэҕинэ, бэйэҕит эмтээмэҥ, тута бырааска көрдөрүҥ.
- Элбэх киһи баар сиригэр сылдьартан туттунуҥ.
- Тус гигиена быраабылаларын тутуһуҥ. Илиини мыыланан сууйуҥ.
- Фруктаны, оҕуруот аһын кичэйэн сууйуҥ, оргуйбут уунан сайҕааҥ.
- Оргуйбут эбэтэр ыраас ууну эрэ иһиҥ.
- Оргутуу, ультрафиолет, дезинфекциялыыр средстволар вируһу суох оҥороллор.
This post was published on 11.10.2016 15:32 15:32