Сэби-сэбиргэли, сааны-саадаҕы сокуоннайа суох эргитии эйгэтигэр кэһиилэри булар сыалтан Росгвардия управлениетын полицейскайдара муус устар 21 күнүгэр уочараттаах рейдэ ыыттылар.
Маныаха саалаах тыһыынча кэриҥэ киһини олорор сирдэринэн сылдьан бэрэбиэркэлээбиттэр. Рейдэҕэ Росгвардия бары салаалара — лицензионно-разрешительнай, харабыллааһын, ОМОН, СОБР итиэннэ ис дьыала уорганнарын полицейскайдара уонна чааһынай харабыллыыр тэрилтэлэр үлэһиттэрэ кыттыбыттар.
Рейдэ кэмигэр административнай сокуону кэһии 40 чахчытын булбуттар, 55 сааны-саадаҕы, сэби-сэбиргэли (ол иһигэр 11-рэ — хаһаайыннара өлөн) былдьаабыттар. Баҕа өттүнэн харчынан манньа иһин гражданнартан 5 саа бэриллибит.
Маннык рейдэлэр сүрүн сыаллара — сэпкэ-сэбиргэлгэ сыһыаннаах буруйдары эрдэттэн сэрэтии, булуу, сэрэхтээхтик туттуу быраабылаларын быһаарыы, докумуоннары бэрэбиэркэлээһин.
Биллэрин курдук, ыам ыйыгар саха эр дьоно күүтүүлээх сааскы куска тахсыаҕа. Итинэн сибээстээн, Росгвардия управлениетын Лицензияны биэрэр, көҥүллүүр киинэ санатар:
[vc_row][vc_column][vc_message message_box_style=»3d» message_box_color=»grey»]
- Сааны анал хааҕа уган илдьэ барыллыахтаах;
- Бултуу тахсыбыт киһи бултуур билиэтин, лицензиятын, сааны илдьэ сылдьарын көҥүллүүр докумуоннарын илдьэ сылдьыахтаах;
- Саатыгар туора киһини чугаһатыа суохтаах, сэрэхтээх буолуу быраабылаларын тутуһуохтаах;
- Итирдэр утахтары иһиэ суохтаах.
[/vc_message][/vc_column][/vc_row]
Бу дьыл маҥнайгы кыбаарталыгар анал рейдэлэр кэмнэригэр өрөспүүбүлүкэ үрдүнэн сокуоннайа суох эргитииттэн 2000-тан тахса сэп-сэбиргэл былдьаммыт. Бу туһунан управление пресс-сулууспата иһитиннэрдэ. edersaas.ru
Хаартыска: РФ Росгвардиятын Саха сиринээҕи управлениетын пресс-сулууспатын түһэриитэ.
