Үс күн устата барбыт “Роботтар оонньуулара” түмүктэннэ. Казахстантан биир уонна Саха сириттэн 19 хамаанда кытынна. Күрэхтэһии “кольцевые гонки”, “грузовой порт”, “сумо” диэн үс түһүмэҕинэн ааста. Уопсай түмүккэ муҥутуур кыайыылааҕынан С.П.Данилов аатынан Бэрдьигэстээх (Горнай улууһа) орто оскуолатын үөрэнээччилэрэ Семен Борисов, Петр Дьячковскай таҕыстылар.
Алтыс кылаас үөрэнээччитэ Петр Дьячковскай роботтарынан 4-с кылаастан интэриэһиргээбитин, тэрээһиҥҥэ олус элбэх оҕо кыттыбытын, Оонньуулар чэрчилэринэн араас түмэллэргэ сылдьыбыттарын кэпсиир уонна бастаабыттарыттан үөрэрин биллэрэр.
«Сыллата элбэх күрэхтэһиини ыытабыт. Кэлиҥҥи сылларга өрүү үчүгэйдик Бэрдьигэстээх орто оскуолата кыттар. Биһиги үөрэхпитин бүтэрбит, СӨ Дьоҕус компьютернай академиятыгар дьарыктаммыт эдэр Арсен Алексеев тиийэн тренердии сылдьар. Иитиллээччилэрин көрдөрүүлэрэ лаппа тубуста — “Роботтар оонньууларын” муҥутуур кыайыылааҕынан буоллулар. Төҥүлү тренерэ В.В.Кычкин оҕолору кытта дьарыктаммыта хаһыс даҕаны сыла буолла, кини иитиллээччилэрэ эмиэ үчүгэй түмүктэри көрдөрөллөр. Өрөспүүбүлүкэтээҕи лиссиэй куруук биһигини кытта бииргэ оҕолорун эрчийэр, үчүгэйдик кытталлар. Атын даҕаны күүстээх хамаандалар элбэхтэр. Урукку сылларга холоотоххо, кыттааччылар бары эппиэтинэстээхтик, күүскэ бэлэмнэммиттэр. Үөрэтэр-эрчийэр түмсүүнү ыыппыппыт. Оҕолор онно күүскэ дьарыктаммыттара таайда быһыылаах. Урут “грузовой порт” түһүмэххэ аҕыйах хамаанда кыттар эбит буоллаҕына, быйыл бары уонна бэркэ кытыннылар диэн бэлиэтиир оруннаах. Тустаах күрэхтэһиигэ үчүгэй программирование ирдэнэр. Интеллектуальнай оонньууларга бэлэмнэнэ таарыйа оҕолор таһымнара лаппа үрдээтэ», — диэн СӨ Дьоҕус компьютернай академиятын дириэктэрэ, “Роботтар оонньуулара” күрэхтэһии кылаабынай судьуйата Василий Максимов кэпсиир.
Людмила ПОПОВА, “Саха сирэ” хаһыат, edersaas.ru
Андрей СОРОКИН, Светлана ПАВЛОВА (СИА) хаартыскаҕа түһэриилэрэ.
