Дьокуускай куорат Рихарда Зорге аатынан уулусса 17/2 баар дьиэ олохтоохторо эркиннэрэ хайыта ыстана турар дьиэҕэ олороллорун туһунан СИА-ҕа эттилэр.
«Оробуочайдар биһиги дьиэбитин өрөмүөннүүртэн аккаастаналлар, тоҕо диэтэххэ дьиэ өһүөтэ эмэҕирбит, ону таарыйдахха сууллан түһэр кутталлаах», — дииллэр кинилэр.
Урукку өттүгэр исписэлиистэр эрдэттэн сэрэппэккэ эрэ дьиэни өрөмүөннээбиттэр. «Үс күн үлэлээн баран номнуо сэттис күнүн тугу да гымматтар», — дииллэр олохтоохтор.
Хапытаалынай өрөмүөн фондата (ФКР) үлэ бара турарын туоһулуур. Манна өрөмүөннүүр үлэҕэ куонкуруһу «Монолит» ХЭТ кыайбыт.
«Компания өрөмүөннүүр үлэни ыам ыйыгар саҕалыахтаах этэ, ол эрээри хантараак усулуобуйатын толорботоҕо. Бас билээччи да, сакаасчыт да кинилэри улаханнык сэмэлииллэр. Биригээдэни тутуу матырыйаалынан хаачыйбатахтарын түмүгэр үлэ тохтоон турар. Бэдэрээччити кытта дуогабар көтүрүлүннэ», — диэн фондаҕа эттилэр.
«Монолит» ХЭТ оннугар «Кристалл» ХЭТ үлэҕэ киирдэ. Маныаха майгынныыр бөрүкүтэ суох быһыы-майгы бу курдук аадырыстарга үөскээбит: Дежнев 75/1, 89/2, 91.
«Монолит» суобаһа суох бэдэрээччиттэр ахсааннарыгар киирэр. Маннык тэрилтэлэртэн былаан көрдөрүүтэ, өрөмүөн болдьоҕо кэһиллэр. Ити барыта биллэн турар, дьиэ олохтоохторугар ордук улахан охсуулаах», — дииллэр фондаҕа.
Рихард Зорг уулуссатыгар турар дьиэ дьоно саҥа бэдэрээччит үлэни хаачыстыбалаахтык оҥоруоҕар саарбахтыыр.
«Кристалл» үлэһиттэрэ маннык үлэлэри оҥорорго көҥүллэрэ суоҕун туһунан этэллэр. Оҥорбуттара барыта аны саас тиийэн алдьаныан-кээһэниэн туһунан этэллэр», — дииллэр дьиэ хаһаайыттара.
