Андрей Борисовы Госдума быыбарыгар биир мандааттаах уокурукка кандидат быһыытынан киллэриигэ илии баттааһыны хомуйууга сокуону кэһии тахсыбытын туһунан үҥсүүнэн Саха сиригэр кэлбит РФ Быыбар киин хамыыһыйатын бэрэстэбиитэлэ Александр Клюкин, өрөспүүбүлүкэҕэ сокуон кэһиллиитэ атын регионнардааҕар элбэҕэ суоҕун бэлиэтээтэ.
«Саха сиригэр кэһиилэр бааллар, ол ахсаана сорох көрдөрөр-иһитиннэрэр тиһиктэргэ этиллибитин курдук, аһара элбэҕэ суох. Судургута суох да, чэпчэки да кэһиилэр бааллар, ол эрээри атын регионнары баһыйар элбэх диир сөбө суох. Москваҕа олорон иһитиннэриини ылыы, оттон миэстэтигэр кэлэн билсии – букатын атыттар, тус-туспалар. Манна икки күн устата бара турар процесс икки өрүттэрин кытта үлэлиибит», — диэн Александр Клюкин суруналыыстарга эттэ.
«Кандидат иһин административнай ресурсаны туттуу туһунан этэр буоллахха, маны билигин үөрэтэ-ырыта сылдьабыт. Быыбар киин хамыыһыйатын таһынан үлэлиир боломуочуйалаах уорганнар кыраҕытык кэтээн көрөллөр. Административнай ресурса туттуллубутун дуу, суоҕун дуу өрөспүүбүлүкэ маныаха боломуочуйалаах уоргана сыана быһыаҕа», — диир кини.
«Илии баттааһынын хомуйуу туһунан этэр буоллахха, Быыбар киин хамыыһыйата сэмэлээһиннэри ылынна, маны ырытар уонна өрөбүлгэ чопчу быһаарыыны ылыаҕа. Хамыыһыйа кандидат регистрацияны ааһарыгар сөптөөх илии баттааһын хомуллубутун дуу, суоҕун дуу быһаарыаҕа. Үлэ бара турар», —диэн Александр Клюкин түмүккэ эттэ.
