РФ Уһук Илини сайыннарыыга министиэристибэтэ Россия бырабыыталыстыбатыгар уһук илиҥҥи демографическай бэлиитикэтин концепциятын бигэргэттэ. Ол туһунан уураах бүгүн бэчээккэ таҕыста.
Туһааннаах министиэристибэ салайааччыта Александр Галушка ылыллыбыт концепция Уһук Илиҥҥэ демографическай балаһыанньа тупсарыгар туһалыырыгар эрэллээх. Ол эбэтэр өлүү аҕыйыа, көһүү кыччыа, төрөөһүн эбиллиэ, ону сэргэ регионнарга эдэр исписэлиистэр олохсуйууларыгар интэриэс баар буолуо.
Бырайыак икки этаабынан ыытыллыа. 2020 сылга диэри Уһук Илиҥҥэ киһи ахсаана 6,2 мөл. таһымы тутуо, онтон 2025 сылга 6,5 мөл. тэҥнэһиэ.
Бастакы түһүмэххэ дьиэ кэргэҥҥэ бастакы оҕо төрөөһүнүн өйүүр эбии миэрэлэр ылыллыахтара, ону сэргэ иккис уонна үһүс оҕону төрөтүү эмиэ биһирэниэ. Ол эбэтэр чуолаан оҕо төрөөтөҕүнэ бэриллэр босуобуйа регионнардааҕы ситимнэрин сайыннарыы былааннанар, маны сэргэ элбэх оҕолоох ыаллар оҕолоругар нолуокка чэпчэтиилэр киллэриллиэхтэрэ.
Регионнааҕы ийэ хапытаалыгар эмиэ уларытыылар киириэхтэрэ. Концепцияҕа этиллэринэн, хапытаалы туттуу хайысхата кэҥээн биэриэ.
Дьиэ кэргэн оҕо төрөттөҕүнэ кинилэр олорор усулуобуйаларын тупсарыыга пилотнай бырагыраама үлэлиэ. Социальнай ипотека, чааһынай дьиэни туттуу уонна да атын баар механизмнар туттуллуохтара.
«Кэлэр үс сылга регионнарга демография сайдыытыгар ылыммыт бырагыраамалара үлэлээн барыахтара. Хас биирдии регион уратыта учуоттаныа. 2018 сыл бүтэһигэр дьон көһүүтүн үс төгүл кыччатыахпыт, онно анаан саҥа үлэ миэстэлэрин таһаарыахпыт«, — диэтэ миниистир.
Эдэр кадрдары региоҥҥа олохсутар туһуттан Россия атын регионнарыттан Уһук Илиннээҕи үрдүк үөрэх кыһаларыгар үөрэтиигэ биир кэлим миэрэлэр ылыллыахтара. Эдэрдэр өйөбүллээх буолуохтара.
Өссө биир сүрүн этии — тас дойдуларга олорор биир дойдулаахтарбыт көһөн кэлиилэригэр эбии усулуобуйалар олохтонуохтара. Маны сэргэ доруобай, чөл олох профилактикатыгар хамсааһыннар баар буолуохтара.
