РФ бэрэсидьиэнин быыбарыгар аҕыс хандьыдаат регистрацияланна

0
34

РФ бэрэсидьиэнин быыбарыгар бастаан 24 баартыйа, 46 бэйэ кандидатуратын туруоруммут дьон кыттыан баҕалаахтарын биллэрбиттэрэ. Кинилэртэн аҕыс хандьыдаат регистрацияланна. Олунньу 17 күнүттэн кинилэр аҕытаассыйаларын саҕалыахтара.


Иккис түһүмэх

Быыбарга киирсээччилэртэн, илии баттааһынын хомуйууга барыта 16 хандьыдаат кыттыбыта. Быыбар киин хамыыһыйата хандьыдааттар хомуйбут илии баттааһыннарын тохсунньу 31 күнүгэр диэри туппута. Олунньу 6 күнүгэр диэри бэрэбиэркэлээн, бүлүтүөҥҥэ кимнээх чопчу киирэллэрин ааспыт нэдиэлэҕэ иһитиннэрбитэ. Санатан эттэххэ, илии баттааһынын хомуйуутуттан РЛДП лидерэ Владимир Жириновскай уонна РФКП хандьыдаата Павел Грудинин, баартыйалара Госдуумаҕа миэстэлээх буолан, босхоломмуттара. Онон быыбар бу түһүмэҕин көтүппүттэрэ.

Оттон иккис түһүмэххэ киирбит 16 хандьыдааттан тохсунньу 31 күнүгэр диэри алта киһи докумуонун туттарбыта. Уон хандьыдаат бу түһүмэҕи кыайан туораабата. Бэлиэтээн эттэххэ, бэйэ кандидатуратын туруоруммут дьон 300 тыһыынчаттан итэҕэһэ суох куолаһы хомуйуохтаахтара. Оттон баартыйалаахтар – 100 тыһыынча.

Быыбар киин хамыыһыйатын бэрэссэдээтэлэ Элла Памфилова иһитиннэрбитинэн, 839 тыһыынча 586 илии баттааһынтан 360 тыһыынчата (хас биирдии хандьыдааттан 60 тыһ. куолас) бэрэбиэркэлэммит, докумуоннары сыныйан үөрэтиигэ исписэлиистэр өттүлэриттэн туох да алҕас тахсыбатах, бэриллибит куоластар бары тэҥ усулуобуйаҕа көрүллүбүттэр. Куоластары бэрэбиэркэлээһини өссө суруналыыстар, хандьыдааттар бэрэстэбиитэллэрэ кэтээн көрбүттэрэ. Онон бу чааһыгар боппуруос суох.

Бүлүтүөҥҥэ киирбит хандьыдааттар

Бэйэ кандидатуратын туруоруммуттартан икки киһи Владимир Путин уонна Владимир Михайлов илии баттааһынын хомуйуутугар ылсыбыттара. Хомойуох иһин, Владимир Михайлов 300 тыһыынча кэрдииһи кыайан ааспата.

Оттон Владимир Путин 85 регионтан барыта 1,5 мөлүйүөн илии баттааһынын хомуйбутуттан, Быыбар киин хамыыһыйатыгар 314,8 тыһ. куолаһы туттарбыта. Итинтэн 232 (0,39 %) илии баттааһына дьиҥэ суоҕунан ааҕыллыбыта. Быраабыла быһыытынан, бу көрдөрүү 5 % куоһардаҕына, хандьыдаат кыайан регистрацияламмат. Онон Владимир Путин бэйэ кандидатуратын туруоруммут 46 хандьыдааттан иккис түһүмэҕи соҕотоҕун ааста.

Баартыйалаахтартан илии баттааһыныгар 14 хандьыдаат кыттыбыт буоллаҕына, Быыбар киин хамыыһыйатыгар 5 киһи докумуонун туттарбыта. Ол курдук, “Яблоко” баартыйаттан киирсэр Григорий Явлинскай 105 тыһ. илии баттааһынын хомуйан биэрбитэ. Мантан 643 (1,07 %) куолас – дьиҥэ суох. “Партия Роста” бэрэстэбиитэлэ Борис Титов 105 тыһ. илии баттааһынын туттарбытыттан 2611 (4,35 %) дьиҥэ суоҕунан ааҕыллыбыта. “Российский общенародный союз” хандьыдаата Сергей Бабурин эмиэ 105 тыһыынча куолаһы киллэрбититтэн 1908 (3,18 %) куолаһа – дьиҥэ суох. “Гражданскай инициативаттан” кыттар Ксения Собчак 104,9 тыһ. куолаһы биэрбититтэн 798 (1,33 %) – дьиҥэ суох. “Коммунисты России” баартыйаттан киирсэр Максим Сурайкин 104,9 тыһ. илии баттааһынын туттарбытыттан 2234 (3,72 %) – дьиҥэ суох.

Онон бу үөһээ ааттаммыт аҕыс хандьыдаат быыбарга илин-кэлин түсүһүөхтэрэ. Бүлүтүөҥҥэ алпаабытынан маннык уочаратынан туруохтара.
1. Сергей Бабурин;
2. Павел Грудинин;
3. Владимир Жириновскай;
4. Владимир Путин;
5. Ксения Собчак;
6. Максим Сурайкин;
7. Борис Титов;
8. Григорий Явлинскай.

633 тыһ. быыбардааччы

Быыбар киин хамыыһыйата иһитиннэрбитинэн, 2018 с. тохсунньу 1 күнүнээҕи дааннайынан, Россия үрдүнэн 108,9 мөл. быыбардааччы баар. Оттон Россия таһыгар өссө 1,8 мөл. киһи учуокка турара бэлиэтэммит. Ол эрээри ити бүтэһиктээх сыыппара буолбатах. Билигин быыбардааччылар испииһэктэрин бэрэбиэркэлээһин бара турар. “Бу икки дааннайы, Россияҕа уонна тас дойдуга баар дьон, испииһэктэрин холбуур табыллыбат. Тас дойдуга баар дьон Россияҕа эмиэ пропискалаахтар, онон хас да испииһэккэ баар буолуохтарын сөп. Ону сэргэ, былырыын быыбардыыр дьон испииһэгин бэрэбиэркэлээбиппит түмүгэр, 563 тыһыынча киһи көҕүрээбитэ. Билигин ити үлэ эмиэ бара турар”, — диэн бэлиэтиир Элла Памфилова.

Оттон биһиги өрөспүүбүлүкэ­битигэр Саха сиринээҕи Быыбар киин хамыыһыйатын бэрэссэдээтэлэ Алексей Ефимов иһитиннэрбитинэн, 633598 быыбардааччы баар. Ол иһигэр 184277 киһитэ Дьокуускай куоракка олорор.

Маны бил!

Билигин урукку курдук быыбарга открепительнай дастабырыанньа диэни ылбаппыт. Ити – быйылгы быыбар биир сүрүн уратыта. Открепительнай оннугар билигин Судаарыстыбаннай өҥөнү оҥорор сайт, “Мин докумуоннарым” нөҥүө эбэтэр Быыбардыыр хамыыһыйаҕа сайабылыанньа суруйан ханна да сырыттарбыт быыбардыыр кыахтанныбыт. Сайабылыанньаны тохсунньу 31 күнүттэн ыла олороллор.
Быыбар киин хамыыһыйата иһитиннэрбитинэн, олунньу 8 күнүнээҕи туругунан, Россия үрдүнэн барыта 266,4 тыһыынча киһи сайабылыанньа суруйбут. Дьон, сүрүннээн, судаарыстыбаннай өҥө порталын нөҥүө сайабылыанньаларын ыыталлар эбит. Бу өҥөнөн номнуо 150 тыһ. тахса киһи туһаммыт.

Манна даҕатан эттэххэ, быыбар күнүгэр тас дойдуга сынньана эбэтэр командировкаҕа барааччыларга анаан, Быыбар киин хамыыһыйата анал учаастактары тэрийиэҕэ. Хамыыһыйа Ростуризмы кытары дуогабар түһэрсэн, быыбардааччыларга туох баар информацияны ыыта олоруоҕа. Онон кулун тутар 18 күнүгэр ханна эмэ сынньана барар буоллахха, туристическай агентстволартан, оператордартан ханна быыбардыахха сөбүн ыйыталаһан, куоластыахха сөп. Билигин 144 дойдуга 381 учаастак баар. Быыбар күнүгэр диэри учаастак ахсаана 400 буолуоҕа диэн иһитиннэрэллэр.

Куолаһы ааҕыыга былырыыҥҥы быыбар курдук, QR-коду туһаныахтара. Бу систиэмэ боротокуоллары көмпүүтэргэ киллэриигэ быдан табыгастаах уонна үлэ хаамыытын түргэтэтэр.

0
0