«Его дочь» саха киинэтэ «Окно в Европу» Россия киинэтин XXIV-с фестивалыгар кыайыылаах үрдүк аатын ылбыта. Киинэ билигин дойду устун көрдөрүллэр. Балаҕан ыйын 21 күнүгэр бу киинэ Ураллааҕы киинэ аһаҕас фестивалыгар кыттар. Режиссер Татьяна Эверстова киинэ туһунан СИА-ҕа иҥэн-тоҥон кэпсээтэ.
Ураллааҕы киинэ аһаҕас фестивала балаҕан ыйын 21-27 күннэригэр Екатеринбург куоракка ыытыллар. Жюрины Оскар бириэмийэ лауреата Владимир Меньшов салайар, президент — биллэр-көстөр, улахан ааттаах-суоллаах Глеб Панфилов. Куонкурус бырагырааматыгар 14 киинэ киирдэ.
— Ураллааҕы киинэ фестивалыгар кыттар эйиэхэ туох суолталааҕый?
— Мин биллэн турар, киинэм куонкурус бырагырааматыгар киирбититтэн олус үөрдүм. Тэрээһиҥҥэ дьону-сэргэни кытта билсиэм, кэпсэтиэм-ипсэтиэм. Манна киинэ индустриятын бөдөҥ деятеллэрэ кытталлар. Холобур, Хотиненко, Соловьев. Мин ханнык эрэ бириискэ тиксиэм дии санаабыппын, ол эрээри эмиэ итинник санаалаах «Окно в Европу» фестивалга барбытым уонна муҥутуур кыайыылаах үрдүк аатын ылбытым.
— «Его дочь» киинэ туспа көрөөчүлээх, чопчу кимиэхэ эрэ ананар дуо?
— Суох, ол эрээри мин санаабын-оннообун, дууһам кыла илигирии хамсааһынын, догуйуутун кытта дьүөрэлии санаалах дьон-сэргэ өйдүөҕэ, ылыныаҕа. Бэйэм оҕо сааһым туһунан санаатахпына, толору тапталга угуттанан улааппыппын өйдүүбүн. «Его дочь» киинэни устарбытыгар мин жюрига дуу, көрөөччүгэ дуу сөбүлэтэр туһунан санаабатаҕым. Сүрэхпэр-дууһабар бүччүм илдьэ сылдьар санаабын, билигин бу орто дойдуга суох миэхэ чугас дьон, өбүгэлэрим тустарынан сэһэргиэхпин баҕарбытым. Бу киинэм – кинилэргэ тапталга билинии. Выборг фестивалыгар ону өйдөөн көрдөхтөрө, ол да иһин кыайыылаах үрдүк аатын иҥэрдэхтэрэ. Киһи иэйиитэ омугуттан тутулуга суох.
Ону таһынан мин киинэбин өйдүүргэ ылынар өй, таптыыр харах, тыыныы, сүрэх тэбиитин атын тэтимэ наада.Тымныы, хаҕыс сүрэхтээх киһи бу киинэни өйдүө да суоҕа. Мин көрөөччүгэ анаан киинэни айбатаҕым, оннук эбитэ буоллар, мин киинэм буолбакка букатын атын киинэ буолуох этэ.
— Санаабыккын, баҕарбыккын барытын киинэҕэ тиһэн киллэрдиҥ дуо?
— Миэхэ баар тапталы киинэнэн хоһуйуохпун баҕарбытым. Ол эрээри киинэни устуу бастыкы күнүттэн ити кыаллыбатын билбитим. Ол да буоллар устуу процеһын тохтотор кыах суоҕа. Алааска суос-соҕотох хааламмын түүнү быһа ытаабытым, удьуордарым миигин бырастыы гыналларыгар көрдөспүтүм уонна иэйиибин барытын тиэрдэр кыаҕа суохпун кытта сөпсөспүтүм. Ити кэлэн ааспыта уонна хаһан да хатыламмат.
— Эн киинэҕин тугу кытта тэҥнииллэрий?
— Кириитиктэр «Его дочь» киинэни Япония киинэлэрин кытта ыкса ситимнииллэр. Киинэни айан, оҥорон таһаарарга элбэх тиэхиньикэ баар, ону туһаммакка бэйэм хайдах баҕарарбынан устар туһунан быһаарыыны ылыммытым. Дирбиэнэ-дарбаана суох, чуумпутук, нус-хас бэйэм сэһэммин сэһэргээбитим, ураты монтаһы туһамматаҕым.
— Режиссердартан хайалара киһи сүрэҕин-дууһатын таарыйар киинэни ордук табан устарый?
— Таптал туһунан киинэлэри устааччылар итини сатыыллар. Холобур, «Любовь» Михаэль Ханеке, «2046» Вонг Карвай, «Новый кинотеатр «Парадизо» Джузеппе Торнаторе киинэлэрин ааттыахпын сөп. Манна таптал араас көстүүлэрин дьүһүйэллэр. Мин киинэбэр далайа көстүбэт, муҥура биллибэт тапталы уонна эбээ, эһээ бу күн сиригэр сотору суох буолуохтарыттан, кинилэр илиилэрин сылааһа хаһан эрэ симэлийэ сүтүөҕүттэн хомолтону көрдөрбүтүм. Ол эрээри кинилэр сылааһынан сайа кууһар илиилэрэ мин сүрэхпэр тыынааҕа үөрдэр!
