«Рецидивист» диэн урут хаста да сууттана, хаайыыга олоро сылдьыбыт, буруй чопчу биир-икки көрүҥэр «идэтийбит» киһини ааттыыллар. Чурапчы улууһугар биир оннук бөрөстүүпүнньүккэ суут уурааҕа тахсыбытын туһунан СӨ Борокуратууратын пресс-сулууспата иһитиннэрдэ.
Суут быһаарбытынан, 27 саастаах М. диэн 2013 уонна 2016 сылларга уорууларга уонна массыынаны күрэтэн сууттаммыт эдэр киһи, 2017 сыл балаҕан ыйыгар эмиэ итинник буруйдары оҥорбут.
Ол курдук, кини Чурапчы сэлиэнньэтигэр тутууга үлэлии кэлбит. Онтон үс күн үлэлээн баран, бииргэ арыгылааһын кэнниттэн, икки киһиттэн суотабай төлөпүөннэрин уорбут уонна Чурапчыга диэри сатыы барбыт (үлэлиир сирдэриттэн 3 км ыраах баар). Ол баран иһэн, аара суолга «УАЗ» массыына турарын көрөн (күлүүһэ баар эбит), өр саарыы барбакка, Дьокуускай куорат диэки куһуурда турбут.
Суут кинини 2 сылга кытаанах эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик.
