29 Кулун тутар 29.03
  • -14°
  • $ 92,26
  • 99,71

Үөрэҕи бүтэрэр эдэр дьон тыа сиригэр үлэлии тиийиэхтэрэ

13:46, 21 апреля 2016
Текст:
Читайте нас на
Яндекс Новости
ЯДВ

Саха сирин үөрэҕин кыһаларын бүтэрэр 1000 эдэр дьон тыа сиригэр үлэлии барыахтарын баҕаралларын туһунан эттилэр. Кинилэргэ өрөспүүбүлүкэ бырабыыталыстыбата эргиччи көмөлөһүөҕэ. Ити туһунан «Выпускник-2016: за новое село!» диэн бу күннэргэ буолан ааспыт форумҥа эттилэр.


Тэрээһини ХИФУ иилээн-саҕалаан ыытта. Университет үөрэҕи бүтэрээччилэргэ анаан үлэ биэрэччини, муниципальнай тэриллиилэр баһылыктарын уонна бырабыыталыстыба бэрэстэбиитэллэрин кытта көрсүһүүнү тэрийдэ.

Тыа сиригэр үлэһит илии тиийбэтин кыһалҕата бүгүн эрэ саҕаламматаҕа. Миниистирдэр кабинеттара сылын аайы улууска үлэлии барааччылары өйүүр тус сыаллаах бырагыраамалары оҥорор.

Форум кэмигэр эдэр дьон оройуоннарга бизнеһи сайыннарыыга бэйэлэрин бырайыактарын бэлэмнээтилэр.

2016 сылга ХИФУ 3 тыһыынча кэриҥэ эдэр исписэлииһи бэлэмнээн таһаарарыттан быһа холуйан 700 улуустарга үлэлии тиийиэхтэрэ. Кинилэргэ эбии Саха сиригэр баар атын үөрэх кыһаларын бүтэрэр 300 эдэр киһи төрөөбүт улуустарыгар үлэлии, айа-тута тиийиэхтэрэ.

Форумҥа өрөспүүбүлүкэ баһылыга Егор Борисов кытынна.

«Карьераны олох сүрүн сыала оҥостуу сөбө суох. Саамай сүрүнэ – хайа да усулуобуйаҕа наадалаах буолуу. Ханна баҕарар үлэни өрө туттахха, мэлдьи наадалаах буолуоҥ!», — диир кини.

Егор Афанасьевич бэлиэтээбитинэн, сыралаһар, туруулаһар эрэ ыччат бырабыыталыстыба көмөтүн ылыаҕа.

«Бизнеһи саҕалыырга, бэйэ суолун тобулан үлэлииргэ-хамсыырга былаас көмөлөһүөҕэ. Оттон биир сиргэ үҥсэргии олорор буоллаххытына, өйөбүл көрүллүбэт», — диэтэ баһылык.

Түгэх, үөс сиртэн тэйиччи да сиргэ олорон ситиһиилэниэххэ сөбүн Егор Афанасьевич чиҥэтэн эттэ. Кини оробуочайтан саҕалаан үүнэн-сайдан тахсыбыт салайааччылар тустарынан кэпсээтэ. Егор Борисов Госдума быыбарыгар кандидаты талар «Биир ньыгыл Россия» баартыйа барыллааһын куоластааһыныгар кыттар Галина Данчикованы холобур быһыытынан аҕалла.

«Эһиги иннигитигэр тыыннаах холобур. Галина Иннокентьевна хоту улууһугар үлэтин аан бастаан саҕалаабыта. Онон, ыраах хоту улууска үлэлии барааччылар толлумаҥ! Эһиги бырабыыталыстыба бэрэссэдээтэлэ буолар кыахтааххыт», — диэтэ Егор Борисов.

Үлэни биэрээччилэргэ, былаас уорганын бэрэстэбиитэллэригэр оҕолор бэйэлэрин бырайыактарын билиһиннэрдилэр. Агропромышленнай комплексы, медицинаны, рекламаны, полиграфия өҥөтүн сайыннарыыга анаммыт бырайыактары көрдөрдүлэр.

ХИФУ медицинскэй институтун бүтэрээччи Михаил Сивцев Чурапчыга кэтэх стоматологическай клиниканы үлэлэтэр баҕалаах. Маны олоххо киллэриигэ судаарыстыбаттан 3 мөл.солк. кээмэйдээх өйөбүл наада. Ити харчы оборудованиены атыылаһыыга, үлэһиттэри хамнастыырга наадалаах. Үөрэҕи бүтэрээччилэр бэйэ дьыалатын саҕалыырга эрэ буолбакка, тыа сиригэр үлэ миэстэтин таһаара сатыыллара хайҕанна.

Галина Данчикова бырайыактар интэриэһинэйдэрин, ол эрээри өссө да ситэрэр-хоторор наадатын ыйда.

«Бүгүн бэйэлэрин бырайыактарын билиһиннэрбит оҕолор баҕалара бизнес-былааҥҥа кубулуйарыгар көмөлөһүөхпүт. Тыа сиригэр барыта эриэ-дэхси буолбатах, уустуктар бааллар. Ону барытын тулуйуоххут диэн бүк эрэнэбин. Тыа сиригэр үлэлии барааччылар улуустары тупсарыыга туох наадатын, тыа сиригэр ыччаты хайдах угуйары, тардары өйдүүллэр, билэллэр», —диэтэ премьер.

Следите за самым важным и интересным в Telegram-канале и WhatsApp-группе ЯСИА