Зоя Багынанова: Артыыс оонньуон баҕарар санаата хаһан да уостубат

0
167

Бүгүн Саха Өрөспүүбүлүкэтин норуодунай артыыската, Үөһээ Бүлүү улууһун уонна Амма улууһун Абаҕа нэһилиэгин бочуоттаах олохтооҕо Зоя Петровна Багынанова 75 сааһын томточчу туолла.


Бу үбүлүөйдээх күҥҥэ Зоя Петровнаттан биир-икки ыйытыыга эппиэттииригэр көрдөстүбүт.

— Зоя Петровна, эн билигин эдэр сааскыттан ыра гыммыт ханнык оруолу оонньуоххун баҕараҕын?

— Дьикти баҕайытык, Алампа пьесаларыгар бииригэр да оонньообокко хаалбыт эбиппин. Дьиҥэр, эдэр сылдьан Ньурба тыйаатырыгар, Саха тыйаатырыгар үлэлиир кэмнэрбэр Алампа пьесалара элбэхтик турбуттара да, хайдах эрэ быысаһан хаалбыппын. Онтон хомойо саныыбын. Билигин эмээхситтэр оруолларын биэрдэхтэринэ үөрүүнэн оонньуубун. Урукку курдук үрдүкү классикаҕа оонньуохпун эмиэ баҕарабын. Уопсайынан, артыыс оонньуон баҕарар санаата хаһан да уостубат дии саныыбын. Быйыл Сергей Потапов Испания драматура А.Касона «Сарсыардааҥҥы фея» пьесатын туруоруом диэбитэ. Онно Айанньыт (Странница) диэн өлүү дьахтарын оруола баар. Ону оонньуохпун баҕарабын.

— Эн, бэйэҥ этэргинии, идеянан «иэдэйбит» киһигин. Араас үйэлээх идеяларгын олоххо киллэрбиккин дьон-сэргэ үчүгэйдик билэр уонна сыаналыыр. Ол курдук, хоһоонунан испэктээкиллэртэн саҕалаан киинэтигэр тиийэ элбэх бырайыакка сылын ахсын сылайбакка үлэлэһэҕин уонна онтуҥ хайаан да үчүгэй түмүктээх, ситиһиилээх буолар. Аны, билигин, олоххо ханнык бырайыаккын киллэриэххин баҕараҕын?

— Билигин да үлэлиэх баҕам хара баһаам. Идеяларым да элбэхтэр. Олортон аан бастакынан Федот Федотович суруйууларыттан наардаан, тыйаатыр эйгэтин үлэһиттэригэр туһалаах үөрэтэр кинигэ курдук таһааттарыахпын баҕарабын. Ол кинигэбит оҥоруутун театровед Ангелла Поповалыын саҕалаатыбыт. Ити кинигэ үчүгэйдик оҥоһуллан, уһаабакка күн сирин көрүөн баҕарабын.

Быйылгы «Хаарыан хампа» IX-с республиканскай театральнай фестивальга Зоя Петровнаҕа «Театральнай искусство сайдыытыгар кылаатын иһин» диэн Саха Өрөспүүбүлүкэтин театральнай диэйэтэллэрин сойууһун анал бириэмийэтэ бэриллибитэ. Зоя Петровна айар үлэтэ биир идэлээхтэрин үрдүк сыанабылын ылбытыттан биһиги олус үөрэбит, киэн туттабыт.

Саха тыйаатырын бары үлэһиттэрин аатыттан Зоя Петровнаны үбүлүөйдээх төрөөбүт күҥҥүнэн ис сүрэхтэн итиитик-истиҥник эҕэрдэлиибит!

Айар талааныҥ, умсулҕаннаах үлэҥ уҕараабатын, бараммат баай санааларыҥ өссө үрдүккэ кынаттаан көтүттүннэр! Бар дьонуҥ, таптыыр сахаҥ норуотун чэчирии сайдарын туһугар айа-тута, үөрэ-көтө, эдэрдэргэ искусствоҕа бэриниигинэн өрүү холобур буола сылдьаргар баҕарабыт!

 

0
0

Хоруй суох

Хоруйдаа