«Биһиги бииргэбит» аһымал фонда президенэ Артем Науменко Өрөспүүбүлүкэтээҕи 2 №-дээх балыыһа ыарыһахтарыгар таҥас-сап хомуйар баҕатын биллэрбитин, аан бастаан соһуйа истибиттэрэ. Маннык үтүө дьыаланы нэһилиэнньэ социальнай өттүнэн көмүскэлэ суох араҥатыгар анаан, аһымал фонда үлэһиттэрэ тэрийэллэр.
Өрөспүүбүлүкэтээҕи 2 №-дээх балыыһа пресс-сэкирэтээрэ Зоя Игнатьева иһитиннэрбитинэн, хааннарын эргиирэ кэһиллиилээх ыарыһахтар сытар неврология отделениетын сиэстэрэ-хаһаайкатыгар хоруопкалаах уонна бакыаттаах маллары аҕалан туттарбыттар, эр киһи уонна дьахтар сабыс-саҥа таҥастара, атах таҥаһа, уо.д.а.
Биллэрин курдук, 2 №-дээх балыыһа тымыр-сүрэх регионнааҕы киинигэр эмтэнэр ыарыһахтар ортолоругар түптээн олорор сирэ-уота, көрөр-харайар киһитэ суох дьон аҕыйаҕа суохтар. Кинилэр кыһыҥҥы тымныыга үлүйэн, бааһыран, илиилэрэ-атахтара тостон, инсуллаан, инфарктаан балыыһаҕа киирэллэр. Эмчиттэр кимиэхэ да аккаастаабаттар. Үрүҥ халааттаах аанньаллар кинилэри эмтииллэрин сэргэ, бу ыарыһахтар социальнай балаһыанньаларын быһаараллар, киһилии аһаталлар-таҥыннараллар.
Онон фонда хомуйбут таҥаһа-саба бэйэлэрин хаһаайыннарын булаллара саарбаҕа суох.
«Биһиги отделениебыт ыарыһахтара балыыһаҕа киирбит таҥастарын, биллэр төрүөтүнэн, сороҕун суох гынарга күһэллэбит. Ол эрэн, тахсалларыгар таҥас наада буоллаҕа. Онон ардыгар эмчиттэр бэйэлэрэ дьиэлэриттэн таҥас аҕалар түгэннэрэ баар буолааччы. Маннык кыһалҕа баарын өйдөөн, биһиги фондабыт хомуйбут таҥаһын-сабын балыыһаҕа (бэйэм отделениебыттан саҕалаан) аҕаларга быһаардыбыт«, – диэн бу отделениеҕа үлэлиир невролог-быраас Артем Науменко үтүө дьыала туһунан кэпсээтэ.
