Өрөспүүбүлүкэ үрдүнэн 23 ойуур баһаарын умуруорууга үлэлэһэллэр, онтон биэһэ бохсулунна. Бу туһунан экология харыстабылын министиэристибэтин пресс-сулууспатыгар сигэнэн, СИА иһитиннэрэр.
Уот 1 340 га сири сиэтэ. Ааспыт сууккаҕа икки уоту Намҥа уонна Уус-Алдаҥҥа, ыраах сытар сирдэргэ 2 ойуур баһаарын умуруордулар. Уоту умулуннарыыга 672 киһи, 56 техника үлэлээтэ.
Ыраах сытар 256 290 га иэннээх сиргэ 42 уот көрдүгэнэ баара биллэр. Балары космическэй сириэстибэлэринэн кэтииллэр.
Экология министиэристибэтэ ойуурга уот көрдүгэнин көрбүт буоллаххытына 8-4112-44-74-76 эбэтэр 8-800-100-94-00 нүөмэрдэргэ эрийэн биллэрэргитигэр көрдөһөр. Ойуурга уоту сэрэхтээхтик туттаргытыгар ыҥырар.
