Өрөспүүбүлүкэ бааһынайдара Ил Дархан быыбарыгар Айсен Николаевы өйүүллэрин биллэрдилэр

0
11
SONY DSC

Саха Өрөспүүбүлүкэтин бааһынай (фермер) хаһаайыстыбаларын уонна тыа хаһаайыстыбатын кэпэрэтииптэрин ассоциациятын үгэскэ кубулуйбут ыһыаҕа Дьокуускай куорат Үс Хатыҥар түһүлгэлэнэн ааста.


Ассоциация бэрэсидьиэнэ, “Туймаада” АУо генеральнай дириэктэрин солбуйааччы Александр Артемьев этэринэн, улуустардааҕы ассоциациялар салалталара уонна үлэлэрэ сөргүтүллүбүтүн түмүгэр быйылгы ыһыахха өрөспүүбүлүкэ улуустарыттан көхтөөхтүк кытыннылар. Ол курдук, Амма, Мэҥэ Хаҥалас, Чурапчы, Таатта, Уус Алдан, Хаҥалас, Нам, Бүлүү, Өлүөхүмэ, Ньурба, Сунтаар, Кэбээйи, Дьааҥы улуустарыттан уонна Дьокуускай куораттан ыһыаҕы тэрийэр-хааччыйар үлэһиттэрдиин 200-чэ киһи түмсэн ааста.

Манна сыһыаран эттэххэ, сылга биирдэ тэриллэр улахан дьаһал киин куоракка ыытылларынан, сүрүн эппиэтинэс Дьокуускай куораттааҕы тыа хаһаайыстыбатын управлениетыгар (салайааччы Николай Афанасьев) уонна киин куорат фермердэрин, кэпэрэтииптэрин түмсүүтүгэр (бэрэссэдээтэл Надежда Шелковникова) сүктэрилиннэ. Инньэ гынан, ыһыах аһын-үөлүн куорат тэрилтэлэрэ уонна уйгулаах сайыны уруйдуур сиэри-туому, ырыаны-үҥкүүнү Хатастааҕы Култуура киинин үлэһиттэрэ көмөлөөн, кыайа-хото туттулар.

Саха сиринээҕи АККОР 1200 чилиэннээх. Элбэх киһи түмсэригэр түбэһиннэрэн, ыһыах иннинэ уочараты таһынан конференция тэрийэн, ассоциация устаабыгар уларытыылары киллэрбиттэрин дьүүллэһэн ылыннылар. Ону тэҥэ АККОР бочуоттаах бэрэсидьиэнэ Валерий Ефремов балаҕан ыйынааҕы быыбарга Ил Дархан солотугар хандьытаат Айсен Николаевы өйүүр ис хоһоонноох ыҥырыыны ааҕан иһитиннэрбитин дэлэгээт бааһынайдар биһирииллэрин биллэрэн, ыҥырыы сурук аннынан илии баттаатылар.

Ыһыах дьонун, ыалдьыттарын бырабыыталыстыба бэрэссэдээтэлин солбуйааччы э.т. Денис Белозеров, тыа хаһаайыстыбатын миниистирин э.т. Александр Атласов, Дьокуускай куораттааҕы тыа хаһаайыстыбатын управлениетын салайааччыта Николай Афанасьев, Аграрнай партия Саха сиринээҕи салаатын бэрэссэдээтэлэ, “Туймаада” хампаанньа генеральнай дириэктэрэ Александр Васильев, АККОР бэрэсидьиэнэ Александр Артемьев  о.д.а. эҕэрдэлээтилэр уонна чулуу көрдөрүүлээх бааһынайдарга наҕараадалары туттардылар. Тупсаҕай түһүлгэ, төрүт ас-таҥас, ырыа-оһуохай, күүстээхтэр-сымсалар күөн күрэстэригэр итиэннэ ыһыах тэрээһинигэр барытыгар көхтөөхтүк кыттыбыт улуус баһылыга Николай Старостин салайааччылаах Мэҥэ Хаҥаластааҕы ассоциация халыҥ хамаандата эрэллээхтик бастаата. Иккискэ чурапчылар, үһүскэ таатталар таҕыстылар.

Василий НИКИФОРОВ, edersaas.ru

0
0