Владимир Путин ыам ыйын 6 күнүгэр COVID-19 утары охсуһууга ылыллыбыт быһаарыылар туолууларыгар мунньахтыаҕа. Ол туһунан РИА-новости ханаалга президент пресс-сэкирэтээрэ Дмитрий Песков эттэ.
Ааспыт нэдиэлэҕэ дойду президенэ олохтоохторго ыҥырыытыгар үлэлээбэт күннэри ыам ыйын 11-гэр диэри уһатары эппитэ. Путин маны сэргэ Роспотребнадзорга туһаайан, Госсовет оробуочай бөлөҕүн кытта ыам ыйын 5 күнүгэр диэри хааччахтааһын миэрэлэриттэн тахсар туһунан этиилэри киллэрэригэр сорудахтаабыта. Ол эбэтэр ыам ыйын 12 күнүттэн эпидемиологическай балаһыанньаны учуоттаан туран, коронавируһунан сибээстээн ылыллыбыт миэрэлэри түһүмэҕинэн көтүрэр туһунан быһаарыы ылыллар.
Бүгүн президент бырабыыталыстыбаттан дакылааттары күүтэр: экономиканы уонна нэһилиэнньэни өйөөһүҥҥэ миэрэлэр уонна быраастар, медперсонал анал страховкаларыгар ыытыллыбыт үлэ тустарынан.
