РФ Президенэ Владимир Путин үп министиэристибэтэ Саха сирин балааһын уорганын кытта тыа сиригэр оҥорон таһаарааччыларга эбии чэпчэтиилэри олохтуур туһунан толкуйдуулларыгар сорудахтаата. Онон өрөспүүбүлүкэ бу чэпчэтиилэри үөскэтиини боруобалыыр регионунан буолар.
«Дьыалабыай Арассыыйа» съеһигэр Путин бастакы саҕалааһыҥҥа методическэй сүбэлэри оҥорорго эттэ.
Саха сирин предпринимателэ тыа хаһаайыстыбатын биир кэлимсэ нолуогун эбэтэр УСН нолуогун төлөөччүлэр НДС нолуогун табаар сыанатыгар эбэллэрин туруоруста.
Бүгүҥҥү туругунан нолуок анал режиминэн үлэлээччилэр ити нолуогу төлөөбөттөр. Ол оннугар тиэхиньикэни, уматыгы атыылаһар сыанаҕа НДС киирэ сылдьар. Ол иһин предпринимателлэр табаар бэйэҕэ турар сыанатыгар ити нолуогу хос киллэрэргэ күһэллэллэр. Аны маҕаһыыннар, атыылааччылар НДС нолуогун эмиэ эбэллэр. Онон нолуогу хос-хос төлөөһүн буолан тахсар.
Путин ити бырабыыталыстыба таһымыгар элбэхтэ ырытыллыбытын туһунан эттэ.
«Бырабыыталыстыба мантан тахсар суолу тобула илик диэн аһаҕастык этэр оруннаах», — диир президент.
Үп миниистирэ Силуанов нолуок анал режимэ – тыа хаһаайыстыбатын биир кэлимсэ нолуога уонна УСН предпринимателлэргэ анаан төһө эмэ судургутуйбутун этэр. Миниистир маннык кыһалҕаҕа ыктарбыттар нолуок уопсай режимигэр көһөллөрүгэр сүбэлээтэ.
«Тыа сиригэр син биир чэпчэтии баар. Тоҕо диэтэххэ, барыс нолуога 0 ыстаапкалаах. Ону таһынан олохтоох былааһы кытта сүбэлэһэн баран региоҥҥа уонна олохтоох нолуокка чэпчэтии киириэхтээх. Субъектар оннук быһаарыылары ылар кыахтаахтар», — диир миниистир.
Ону таһынан кини эбии чэпчэтиилэри федеральнай киин буолбакка, регионнар бэйэлэрэ көҕүлүөхтээхтэрин туһунан эттэ.
«Федеральнай таһымҥа биһиги хаһан да региоҥҥа чэпчэтиини олохтуурга сыһыаннаах дьаһаллары ылбаппыт. Ити сокуонунан бобуллар. Маны барытын регионнарга соҥнообокко, регионнары өйүүр ньымалары оҥоруохпутун сөп», — диэн Путин утары эттэ. «Саха сирин кытта үлэлээҥ!», — диэн кини Силуановка сорудахтаата.
