РФ бырабыыталыстыбата уонна регионнар спордунан дьарыктанар үлэһиттэри уонна кинилэргэ усулуобуйалары тэрийэр салайаачылары көҕүлүүр миэрэлэри толкуйдуохтара. Сорудаҕы Владимир Путин физкультура уонна спорт сайдыытыгар Сэбиэт мунньаҕын кэннэ биэрдэ, диэн «Парламентская газета» иһитиннэрэр.
Сорудаҕы толоруу болдьоҕо — 2020 сыл алтынньы 1 күнэ. Президент тэрилтэлэр штаттатыгар инструктор-методист уонна спортка инструктор дуоһунастарын көрүөххэ сөбүн эттэ. Кинилэр хас буолаллара үлэһит ахсааныттан тутулуктаныаҕа. Муниципальнай тэрилтэлэр эмиэ бу хайысханы тутуһалларыгар сүбэлээтэ.
Миниистирдэр кабинеттара уонна регионнар үлэ миэстэтигэр, олорор сиргэ, сынньалаҥҥа физкультурнай-спортивнай үлэни ыытыыга сүбэлэрдээх методиканы оҥоруохтара уонна бигэргэтиэхтэрэ.
Бырабыыталыстыба 2020 сыл муус устар 20 диэри «Тыа сиригэр спорт» диэн хос бырагырааманы оҥорон бигэргэтиэҕэ. Нэһилиэнньэ спортивнай эбийиэктэринэн хааччыллыытыгар нуорманы киллэриэхтээхтэр.
Судаарыстыба баһылыга физкультура, спорт уонна спортивнай медицина эйгэлэригэр биир кэлим электроннай ресурс оҥорору сорудахтаата. Маны сэргэ миниистирдэр кабинеттара физкультура уонна спорт эйгэтигэр үлэлиир тэрилтэлэргэ нолуокка чэпчэтиилэри көрүүнү эмиэ үөрэтиэхтэрэ.
