Россия бэрэсидьиэнэ Владимир Путин оптуорунньукка Кемеровоҕа сырытыын кэмигэр “Зимняя вишня” эргиэн киинигэр тахсыбыт баһаары силиэстийэлээһиҥҥэ итэҕэйбэт дьон бөлөҕүн кытта көрүстэ.
Бу көрсүһүү кэмигэр кини социальнй ситимнэринэн тарҕанар дьиҥэ суох чахчыларга итэҕэйбэттэригэр сүбэлээтэ.
Уобаластааҕы дьаһалта дьиэтин таһыгар хас да тыһыынча киһи муһунна. Сүрүннээн сыыппараларга итэҕэйбэт буолуу бэлиэтэннэ. Куорат мээрэ Илья Середюк уонна көҕүлүүр бөлөх дьоно 15-кэ киһи судмедэкспертиза моругар баран киирбит өлүктэр испииһэктэрин бэрэбиэркэлээтилэр.
Бэрэсидьиэн былаанын уларытан, судмедэкспертиза дьиэтигэр кэлэн көҕүлүүр бөлөҕү кытта көрүстэ. “Бу дьиэҕэ сыһыаннаан маннык быһаарыныыны ылары тоҕо көҥүллээтигит?”, — диэн Владимир Путин куорат баһылыгыттан ыйытта.
Онуоха мээр бу дьиэни үлэҕэ киллэрии 2014 с. кини бу дуоһунаска олоро илигинэ ылыныллыбытын этэ. Ити эрээри дьиэни 2016 с. бэрэбиэркэлээбиттэр.
“Икки сыл устата бэрэбиэркэ ыытыллыбатах”, — диэн судаарыстыба баһылыга кыыһырда.
Мустубут дьоҥҥо туһаайан бэрэсидьиэн дуоһунаһы уонна чыыны аахсыбакка туран, иэдээн тахсыбыт биричиинэтин кичэллээхтик ыытыахтара диэн эрэннэрдэ.
