Россия Президенэ Владимир Путин Кыайыы параадын кыттыылаахтарын Кыһыл болуоссакка эҕэрдэлээтэ. Судаарыстыба баһылыга сэрии сиэртибэлэригэр, олохтон туораабыт бэтэрээннэргэ мүнүүтэ чуумпунан өйдөбүнньүк оҥордо, СИА суруйар.
Владимир Путин арай Кыһыл аармыйа дойду көмүскэлигэр турумматах буоллун, оччоҕо билигин аан дойдуга туох буолбутун кыайан этэр кыах суоҕун бэлиэтээтэ.
«Убаастабыллаах Россия дьоно-сэргэтэ, күндү бэтэрээннэр, тас дойдуттан кэлбит ыалдьыттар, саллаатар уонна мотуруостар, сержаннар уонна старшиналар, мичманнар уонна прапорщиктар, эпиэһиэрдэр, генераллар уонна адмираллар, эһигини Аҕа дойду улуу сэриитигэр Кыайыы 75 сылынан эҕэрдэлиибин. Аан дойду инникитин төлкөлөөбүт Кыайыы историяҕа саамай киэҥ хабааннааҕынан, суолталааҕынан уонна үрдүк өй-санаа өттүнэн бэриниилээҕинэн хаалыаҕа.
Быйыл Кыайыы 75 сылын үбүлүөйдээх күнэ бэс ыйын 24 күнүгэр бэлиэтэнэр. Оруобуна бу күн 75 сыл анараа өттүгэр сэрии бүппүтүнэн Кремль истиэнэлэригэр кыайыылаахтар параадтара буолбута. Бу параад историяҕа куһаҕаны үтүө, сэриини эйэ, өлүүнү олох кыайыытын быһыытынан хаалар.
Аҕа дойдуну көмүскээччилэр фашистар былаахтарын уонна штандартарын болуоссакка тоҕута быраҕаталаабыттара, ону сиэрдээх иэстэбил уонна күүстээх сэрэтии быһыытынан билиммиттэрэ.
Кыһыл болуоссатынан фронт уонна флот полкалара парааттаан ааспыттара. Кинилэр марштарыгар ийэ дойдуну көмүскээччилэр тыыннара биллэрэ«, — диэтэ Владимир Путин уонна чуумпу мүнүүтэни биллэрдэ.
