Бу ый саҥатыгар Пхеньян уонна Сеул икки ардыларыгар буолбут кэпсэтиилэр түмүктэринэн, Хотугу Корея спортсменнара Пхенчхаҥҥа (Соҕуруу Корея) ыытыллар кыһыҥҥы Олимпийскай оонньууларга кыттар буоллулар.
Ол кэнниттэн салгыы Пханмуджон дэриэбинэҕэ буолбут көрсүһүүгэ өрүттэр Оонньуулар аһыллыыларыгар икки дойду делегацията биир былааҕынан хаамарга сөбүлэстилэр.
Санатар буоллахха, 2000, 2004 уонна 2006 сыллардааҕы Олимпийскай оонньууларга Хотугу Корея уонна Соҕуруу Корея сүүмэрдэммит хамаандалара Корея тумул арыытын омооно ойуулаах былаах аннынан бииргэ хааман тураллар.
Маны сэргэ икки судаарыстыба бэрэстэбиитэллэрэ хоккейга дьахталларга биир сүүмэрдэммит хамаанданы туруорарга быһаарыы ылыннылар. Урукку сылларга бу икки дойду хоккеистара Олимпиадаҕа кыттар кыахтара суоҕа. Арай 2018 сыллааҕы Олимпийскай оонньууларга Соҕуруу Корея хаһаайын быһыытынан бэйэтин хамаандатын туруорар быраабы ылбыта.
