Бу күннэргэ Дьокуускай куоракка «Спорт вместе. По-настоящему!» бырайыак чэрчитинэн, ыарыһах оҕолор боччо оонньууга куораттааҕы чемпионакка кытыннылар.
Сонун бырайыагы «Мегафон» ПАУо көмөтүнэн «Перспектива» уопсастыбаннай түмсүү Россия биэс регионугар, ол иһигэр Московскай, Нижегородскай, Башкортостан, Коми уонна биһиги өрөспүүбүлүкэбитигэр иилээн-саҕалаан ыытар. Саха сиригэр кураторынан «Харысхал» аһымал фондата талыллан үлэлиир.
«Спорт вместе. По-настоящему!» бырайыак сүрүн сыалынан уонна соругунан ыарыһах, инбэлиит оҕолор доруобай оҕолору кытары тэҥҥэ спордунан дьарыктаналларыгар кыах биэрэр. Бырайыак чэрчтинэн Дьокуускай биэс оскуолатыгар ыарыһах, доруобуйаларынан мөлтөх оҕолорго спортивнай күрэхтэһиилэр тиһигин быспакка ыытыллаллар. Маны таһынан Нам улууһун Хамаҕаттатыгар «Лингва» оҕо лааҕырын базатыгар инклюзивнай спортивнай лааҕыр аһыллан үлэлээбитэ.
Балаҕан ыйын 23 күнүгэр Туймаада туонатыгар Параспорт күнэ биллэриллэн, «Мегафон» хампаанньа Уһук Илиннээҕи филиалын уонна «Перспектива» уопсастыбаннай түмсүү бэрэстэбиитэллэрэ Дьокуускай 18-с, 14-с нүөмэрдээх оскуолатын үөрэнээччилэрин кытары көрсөн, аһаҕас уруоктарга кытыннылар.
Хампаанньа Уһук Илиннээҕи филиалын дириэктэрэ Андрей Левыкин: «Социальнай бырайыактарынан биһиги уруккаттан дьарыктанабыт. Ол курдук Бочча диэн хамаанданан оонньууга биһиги улахан болҕомтобутун уурабыт. Бу спортивнай оонньууну доруобуйаларынан мөлтөх, инбэлиит оҕолор сөбүлүүллэр», – диэн кэпсээтэ.
