Бу күннэргэ Мэңэ-Хаңалас улууhугар үрдүк күүрүүлээх уот ситимэ ааһар бобуулаах сиригэр сэрэтиитэ суох оттуу сылдьыбыт киһи электрическай уокка оҕустарда.
Ол курдук, «Муола» хаһаайыстыба үлэһитэ 35 кВ кыамталаах Майа-Төҥүлү линията ааһар сиригэр от кэбиһэ сылдьан, тыраахтар атырдьаҕын өрө таһаараары боруобакка ыкса чугаһаппыт. Тиэхиникэ уонна сир икки ардыгар электрическай ток үөскээбит. Онтон сылтаан тырахтарыыс кабинаттан тахсан иһэн сиргэ үктэнэригэр уокка оҕустарбыт. Билигин кинини Майаҕа улуустааҕы балыыһаҕа быраастар кэтээн көрөллөр.
Электричество уотуттан сэрэхтээх буолуу быраабылаларын кэһии түмүгэр маннык түбэлтэлэр тахсаллар. Дьон-сэргэ уоту уоран туһанар эбэтэр уоту хааччыйар тэрилтэни сэрэппэккэ эрэ холустук туттан үлэлиир-хамсыыр эбит буоллаҕына, электрическай уот дьайыытыгар түбэһиэн сөп.
Үрдүк күүрүүлээх уот ситимэ ааһар сирдэригэр үлэлиэх иннинэ хайаан да электричество уотунан хааччыйар тэрилтэттэн суругунан сөбүлэҥ ылыахха наада. Ону РФ бырабыыталыстыбатын 2009 сыллааҕы 160-с №-дээх дьаһала ирдиир.
«Якутскэнерго» тэрилтэ Киин электрическэй ситимин үлэһиттэрэ бука бары отчуттарга, тыа хаһаайыстыбатын үлэһиттэригэр туһаайан этэллэр: хаһан да, ханнык да түгэҥҥэ электричество уотуттан сэрэхтээх буолары умнумаҥ.
