От ыйыттан «Меркурий» киллэриллэр

Ас-үөл куттала суох буолуутун хааччыйар итиэннэ бэтэринээрийэ эйгэтигэр биир кэлим иһитиннэрэр-биллэрэр эйгэни үөскэтэр туһуттан, Арассыыйа үрдүнэн от ыйын 1 күнүттэн тыа хаһаайыстыбатын бородууксуйатын бары көрүҥэ (үүт, эт, балык, мүөт уо.д.а.) «Меркурий» электроннай ситиминэн регистрацияланар буолуоҕа.

Тамара Уарова, кыраныыссаҕа судаарыстыбаннай бэтэринээринэй хонтуруол салаатын начальнига:

«Меркурий» электроннай ситим көмөтүнэн ас-үөл оҥоһуллуоҕуттан батарыллыар диэри тиһигэ хонтуруолга ылыллыаҕа. Онон бородууксуйа куттала суоҕун туһунан мэктиэлиир бэтэринээр биэрэр сэртипикээтэ уонна ыспыраапката электроннай көрүҥүнэн толоруллуо итиэннэ QR-код көмөтүнэн сканердаатахха, тустаах бородууксуйа туһунан толору иһитиннэрии ылыллыаҕа. Онно бу эт (үүт, балык уо.д.а.) хантан, хаһан аҕалыллыбытын, лабораторнай чинчийиини барбыта эбэтэр барбатаҕа, харайыллар болдьоҕо киллэриллиэҕэ.

Дьиҥинэн, үлэ бу хайысханан тэриллибитэ балачча буолла. Билиҥҥи туругунан, өрөспүүбүлүкэ үрдүнэн бас билии көрүҥүттэн тутулуга суох, тыа хаһаайыстыбатын бородууксуйатын оҥорууга, астыырга-таҥастыырга итиэннэ батарарга сыһыаннаах 25 тыһ. 156 хаһаайыстыбаттан «Меркурий» ситимҥэ киирэр паролу уонна логины 17 тыһ. 578 хаһаайыстыба ылла.

Раиса СИБИРЯКОВА, “Саха сирэ” edersaas.ru

0
0

This post was published on 28.06.2018 09:48 09:48