Оҕолор оскуолаларга кэминэн араарыллан солбуһа сылдьан хайдыһан үөрэммэтэрин туһугар 2025 сылга диэри 57 353 саҥа миэстэ эбии үөскэтиллиэхтээх. Ити туһунан үөрэх министиэристибэтин пресс-сулууспатыгар эттилэр.
Саха сирэ быйыл федеральнай бюджеттан 536 966,3 тыһ. солк. субсидия быһыытынан ылла. Өссө 387,7 мөл. солк. ылбыта. Маннык көмөнөн РФ 57 субъега туһанна. Уопсайа 149 199,1 тыһ. солк. суумалаах көмө траншын атын регионнар бэриллибит үбү-харчыны ситэри туһамматахтарынан Саха сиригэр ыыппыттар. Үп-харчы Дьокуускайдааҕы Геологтар бөһүөлэктэригэр баар 360 үөрэнээччилээх 18-с №-дээх оскуоланы тутууга уонна малынан-салынан ситэриигэ туһаныллыбыт.
Саха сирин баһылыгын уурааҕынан «Содействие созданию новых мест в общеобразовательных организациях в соответствии с прогнозируемой потребностью на 2016-2025 годы» судаарыстыба бырагыраамата үлэлиир.
Бастакы түһүмэх быһыытынан, 2021 сылга диэри 1-4 уонна 10-11 (12) кылаастар үөрэнээччилэрин биир сменаҕа көһөрүөхтэрэ. Ону таһынан эргэ оскуолалартан оҕолору аҕалан үөрэтиигэ эбии миэстэлэр баар буолуохтара.
2025 сылга диэри бырагыраама иккис түһүмэҕэ олоххо киирэр. Эргэ оскуолалартан саҥаларга көһөрүү уонна 5-9 кылаас үөрэнээччилэрин атыттары кытта биир кэмҥэ үөрэтии олоххо киириэхтээх.
