29 Кулун тутар 29.03
  • -14°
  • $ 92,26
  • 99,71

Оскуолаларга эбии миэстэлэри көрүөхтэрэ

Читайте нас на
Яндекс Новости
ЯДВ

Саҥа үөрэх дьылыгар Дьокуускай куорат дьаһалтата оскуолаларга эбии үөрэх миэстэтин таһаарар инниттэн икки саҥа дьиэни атыылаһан үлэҕэ киллэрэр былааннаах.


Иллэрээ күн Дьокуускай куорат баһылыгын эбээһинэһин толорооччу Дмитрий Садовников ити икки эбийиэги итиэннэ өрөспүүбүлүкэ, муниципалитет туһанарыгар биэрэр Киров уулуссатын 15 №-дээх дьиэтин көрдө.

Үөрэх управлениетын начаалынньыга Василий Петров, сыллата оскуолаларга оҕо ахсаана эбиллэн иһэрин, ааспыт 2017-2018 үөрэх дьылыгар 42 тыһ. оҕо үөрэммитин, быйыл тыһыынчаттан тахсанан элбиир чинчилээҕин кэпсиир. “Нэһилиэнньэ эбиллэн иһэр. Онон эбии миэстэ таһаараары атыылаһар сыаллаах эбийиэктэри көрөбүт. Билигин төһө да түөрт оскуола тутулла (6-с, 25-с, “Айыы кыһата”, 35-с) турбутун иһин, миэстэ син биир тиийбэт”, — диэн бэлиэтиир.

203-с микро-оройуоҥҥа тутааччы 14 мэндиэмэннээх олорор дьиэ алын этээһин барытын атыылаһыҥ диэн сүбэлиир. “РФА-инвест” хампаанньа дириэктэрин солбуйааччы Сергей Новгородов иһитиннэрэринэн, тутааччы үөрэнэргэ анаан 700 кв. миэтэрэттэн тахса иэннээх хоһу ыларга этии киллэрэр. Итиниэхэ хампаанньа санитарнай уонна баһаары утары ирдэбиллэри барытын хааччыйар.

Салгыы оробуочай бөлөх Киров уулуссатын 15-с нүөмэрдээх дьиэтин тэхэньиичэскэй туругун көрдө-иһиттэ. Санатан эттэххэ, бу дьиэҕэ эрдэ Н.А.Алексеева лиссиэйэ баара. Ол эрээри, былырыын тохсунньуга дьиэ быыһа сууллан, лиссиэй көһөргө күһэллибитэ. Өрөспүүбүлүкэ дьиэни куорат бас билиитигэр биэрбит. Куорат баһылыгын экэниэмикэҕэ уонна үпкэ-харчыга солбуйааччы Елена Кузнецова: “Лиссиэй дьиэтин хапытаалынай өрөмүөнүн уонна тэрилинэн хааччыйыытын уопсай суумата 18 мөл. солк. тэҥнэһэр, итинтэн 15 мөл. солк. өрөмүөҥҥэ, 3 мөл. солк. тэрилинэн хааччыйыыга барар”, — диэн эттэ. Өрөмүөн үлэтэ тэхэньиичэскэй чинчийии кэнниттэн быһаарыллыаҕа. Үөрэх управлениета тустаах дьиэҕэ Н.А.Алексеева лиссиэйин сэргэ, бастакы мэндиэмэнигэр 17-с нүөмэрдээх оскуола алын сүһүөҕүн оҕолорун үөрэтэр былааннаах.

Баһылык эбээһинэһин толорооччу салгыы Чайковскай уулусса 117/3 турар саҥа дьиэни көрдө. Ити дьиэни атыылаһыы кэтээн көрөр уорганнар көрбүттэрин кэннэ быһаарыллар. “Бүгүн биһиги үөрэххэ биир тутаах соругу – кэлэр үөрэх дьылыгар оскуолаҕа киирээччилэр миэстэлэрин хааччыйыыны быһаарабыт. Эбии миэстэ таһаараары атыыланар эбийиэктэри, ол иһигэр чааһынай тэрилтэлэри эмиэ, көрөбүт. Салгыы бас билээччини кытта усулуобуйатын оҥорсуохпут”, — диэн Дмитрий Садовников этэр.

edersaas.ru саайтка анаан Дьокуускай куорат уопсастабыннаһы уонна СМИ-ни кытта үлэҕэ департамена.

Департамент по связям с общественностью и взаимодействию со СМИ ОА г. Якутска

Следите за самым важным и интересным в Telegram-канале и WhatsApp-группе ЯСИА