Дьокуускай куорат Бүлүүлүүр суолугар баар анал коррекционнай оскуола-интэринээт үөрэнээччилэрэ бу күннэргэ тифлобыһаарыылаах «Жили-были мы» диэн саҥа киинэни көрдүлэр. Бу оскуолаҕа мөлтөхтүк көрөр уонна мөлтөхтүк истэроҕолор үөрэнэллэр.
«Жили-были мы» остуоруйа-киинэни «Хрустальный ключ» диэн сэһэҥҥэ олоҕуран устубуттар. Киинэ Россияҕа ыытыллыбыт үгүс бэстибээллэргэ кыттан бириистээх миэстэлэргэ тиксибитэ. Ол курдук, Сергей Михалков аатынан аан дойдутааҕы куонкуруска лауреатынан буолан, «Золотой Орел» бириэмиэйэҕэ номинацияламмыта. Мөлтөхтүк көрөр уонна мөлтөхтүк истэр дьон көрөллөрүгэр анаан, «Мегафон»хампаанньа өйөбүлүнэн тифлобыһаарыылаах оҥоһуллубута.
Оскуола-интэринээт иһинэн үлэлиир «Словесное творчество» устуудьуйа салайааччыта Мария Барашкова кэпсииринэн, оҕолор киинэни «көрө» олорон дьоруойдары кытары тэҥҥэ үөрэн-көтөн, киинэни олус истиҥник ылыммыттар. «Билиҥҥи үйэҕэ ыарыһах, инбэлиит дьону өйүүр, көмөлөһөр хампаанньалар баалларыттан үөрэбит уонна махтанабыт», – диэн эбэн эттэ.
— Кэлиҥҥи сылларга биһиги хампаанньабыт «Кино для незрячих и глухих» диэн социальнай бырайыагы өйөөн, исписэлиистэр көннөрү киинэлэргэ субтитр, быһаарыы эбэн биэрэр буоллулар, – диэн «Мегафон» Саха сиринээҕи салаатын дириэктэрэ Александр Костерин кэпсээтэ.
Анивера Акимова, edersaas.ru
