Дьокуускай куорат оскуолаларыгар 1 кылааска оҕолору сурутуу тохсунньу 20 күнүттэн саҕаламмыта. Кэлэр үөрэх дьылыгар 3815 миэстэ баар эбит эрээри, олунньу саҥатыгар номнуо 4236 сайабылыанньа киирбит. Былаан туолбут, миэстэ суох. Балаһыанньаттан хайдах тахсаллар?
Кэлиҥҥи сылларга тустаах боппуруос сытыытык турар. Аҕыйах хонуктааҕыта ити кыһалҕаны хайдах быһаарар, саҥа миэстэни таһаарар туһунан СӨ үөрэҕин уонна наукатын миниистирин бастакы солбуйааччы Феодосия Габышеваҕа мунньах буолла.
Былырыын 5147 оҕо оскуола боруогун атыллаабыт эбит буоллаҕына, быйыл 5300 оҕо киириэҕэ диэн сабаҕалыыллар. Биллэн турар, иллэҥ соҕус хостору кылаастарга кубулутан, оҕону барытын ыларга күһэллэллэр. Бырабыыталыстыба итиэннэ Үөрэх уонна наука министиэристибэтин өйөбүлэ суох боппуруоһу быһаарар уустугун Дьокуускай куорат үөрэҕин управлениетын начаалынньыга Василий Петров этэр. Тоҕо диэтэххэ, сыл аайы үөрэнээччи ахсаана эбиллэ турар. Кини үрдүкү кылаас оҕолорун орто анал үөрэх, баҕар, үрдүк үөрэх тэрилтэтин дьиэлэригэр профилынан үөрэтиэххэ сөп этэ диир. Иккиһинэн, эбийиэктэри атыылаһан, маҥнайгы кылааска киирэр оҕо миэстэтин элбэтиэхпит диир. Быйыл былааннаммыт үс дьиэттэн биирэ бэлэм эбит. Итини таһынан, түөрт (25, 6, Арктика оскуолата, Айыы кыһата) оскуола тутулла турар. Оттон айдааннаах 35 оскуола Уһук Илин уокуругу сайыннарыы министиэристибэтин нөҥүө бүддьүөттэн үбүлэнэр бырагыраамаҕа хабыллыбыт. Василий Петров тустаах оскуоланы балаҕан ыйыгар да буолбатар, быйыл үлэҕэ киллэрэ сатыахпыт диэн этэр. Ону таһынан, судаарыстыбаннайа суох оскуолалары өйүүр туһунан боппуруоһу көтөхтө.
Ыспыраапка:
2001-2017 сс. 214 оскуола тутуллубут
Итинтэн 16 оскуола Дьокуускай куоракка
2025 с. диэри 22 тыһ. саҥа миэстэ тахсыахтаах
Итинтэн 16 тыһ. миэстэ Дьокуускай куоракка
Күн бүгүн Дьокуускайга оскуола иннинээҕи саастаах оҕону иитиинэн 40-тан тахса урбаанньыт дьарыктанар эбит. Урбаанньыттар уонна судаарыстыба көмөтүнэн 3-7 диэри саастаах оҕолор бары кэриэтэ уһуйаанынан хабыллан олороллор. Билигин судаарыстыбаннайа суох оскуолалар көмөлөрүнэн эбии саҥа миэстэни таһаарар санаалаахтар. Бүгүҥҥүтэ куоракка 6 судаарыстыбаннайа суох оскуола баара биллэр. “Новая школа — столицы” бырайыактыыр офис салайааччыта Северина Архипова саҥа миэстэни таһаарыы механизмнарын үллэһиннэ. Маныаха үөрэх миниистирин солбуйааччы Феодосия Габышева тустаах боппуруос үчүгэйдик ырытыллыан, үөрэтиллиэн наадатын тоһоҕолоон эттэ.
