Орто Халыма улууһугар сылгы-сүөһү кыһын туоруур аһын бэлэмнээһинэ түмүктэннэ. Үс ый устата кыралыын- улаханныын кыраабыл тутуурдаах ходуһаҕа киирэн оттоотулар. Төһө да күн-дьыл туран биэрдэр, сорох нэһилиэктэргэ ходуһалар ууга бараннар, сыллааҕы былааннарын ситиспэтилэр.
Быйыл улуус үрдүнэн 488 киһи окко киирдэ, 88 тиэхиникэ, 129 звено үлэлээтэ. Уопсайа 5403 га сир охсулунна. Тыа хаһаайыстыбатын тэрилтэлэрэ — 1981 тонна, нэһилиэнньэ — 1745 тонна, бааһынай хаһаайыстыбалар — 1654 тонна, оскуолалар — 204, мобильнай биригээдэлэр 980 тонна оту кыстыкка бэлэмнээтилэр. Онон, СӨ Тыатын хаһаайыстыбатын министиэристибэтин нөҥүө 6589 тонна от былаана бэриллибититтэн, 99%-на туолла, оттон тыа хаһаайыстыбатын улуустааҕы управлениетын нөҥүө 6731 тонна от былаана 98% туолла.
«Арҕахтаахха, Эбээххэ, Сыбаатайга, Налимскайга уонна Ойуһардаахха мобильнай биригээдэлэр үлэлээтилэр, улуус резербэтигэр оттоотулар. Биирдии биригээдэҕэ түөртүү киһи оттоото. Үксэ тиэхиньикэнэн оттуур буоланнар, отчут ахсаана аҕыйах. Былааннаммыт 980 тонна оту толордулар», — диэн тыа хаһаайыстыбатын улуустааҕы управлениетын салайааччытын солбуйааччы Мария Александровна Шарина иһитиннэрдэ.
Быйыл күн-дьыл туран, отчуттарга улахан ардах мэһэйдээбэтэ, онон от үүнүүтүн хаачыстыбата үчүгэйинэн ааҕыллар.
Кэлэр кыстык хайдах буолара биллибэт. Онон, сүөһү эбии аһылыгар сайаапка түһэрилиннэ. «Тимин» ХЭТ нөҥүө 90 тонна уотурба, 40 тонна эбиэс уонна 5 тонна туус атыылаһылынна. «Туймаада Агроснаб» дуогабар быһыытынан уунан тиэйэн иһэр. Эбии аһылык куоракка хаһааныллыаҕа, кыһын суол турдаҕына, нэһилиэктэргэ тиэрдиллиэҕэ.
Ааптар: Римма Ноговицына
