Орто Халыма улууһугар балаҕан ыйын 10 күнүттэн чинчийэр лабораториялаах Ветеринария управлениета ыттарга уонна куоскаларга ииримтийиини уонна чуманы утары быһыы оҥорон саҕалаата. Манна сааскы дьаһалга хабыллыбатах дьиэ кыыллара киирсэллэр. Ыттарга быһыы икки ыйдарыттан саҕалаан оҥоһуллар.
Улууска ииримтийиини утары быһыыны дьиэ кыыллара ылаллара булгуччулаах. Быһыы босхо бэриллэр. Оттон чуманы утары быһыы хаһаайын баҕа өттүнэн туруоруллар. Быһыы сыаната 350 солк. тэҥнэһэр.
«О порядке содержания собак и кошек, экзотических животных и об ответственности их владельцев» СӨ сокуонугар олоҕуран, туох баар дьиэ кыыла регистрацияны ааһыахтаах, пааспар ылыахтаах. Пааспар сыаната 60 солк. тэҥнэһэр.
Дьиэ кыылын регистрациялыыртан куотунар уонна быһыыны бэрдэрбэт дьон административнай эппиэккэ тардылларын туһунан управление сэрэтэр.
Ааптар: Алена Кудрина.
