Орто Халыма оскуолатыгар капитальнай өрөмүөн ситэриллиэҕэ

Быйыл Орто Халыма куорат оскуолатын өрөмүөннүүргэ 23 мөлүйүөн кэриҥэ харчы көрүллүбүт. Манна бэдэрээтчит «Норд Инжини-ринг» ХЭТ бэс ыйын 1 күнүттэн үлэтин саҕалаабыт. Оттон ккис этээс көрүдүөрүн, биэс кылааһы уонна аактабай сааланы кырааскалыырга ИП «Ставинский» үлэлэспит. Оскуола үс этээһэ өрөмүөннэнэригэр симиэтэ суумата 60 мөлүйүөҥҥэ тэҥнэспит, ол гынан баран үбүлээһин кыра буолан, иккис, үһүс этээскэ оҥоһуллуохтаах өрөмүөн үлэтэ ыытыллыбатах.


Орто Халыма куорат оскуолатын тас тиэргэнигэр 12 цветодиоднай лаампа туруоруллубут, аҕыраадата өрөмүөннэммит, сүрүн киирэр аан уларытыллыбыт, кирилиэскэ кафель ууруллубут.

Үгүс үлэ бастакы этээскэ барбыт. Биллэрин курдук, бу этээс тымныы буолан, оҕолорго, үлэһиттэргэ доруобуйаларыгар, үөрэхтэригэр охсуулаах этэ. Онон манна конвектор, ититии бэнтилээтэрэ, радиатордары сууйарга-ыраастыырга аналлаах кырааннар туруоруллубуттар, эркиннэрэ кырааскаламмыт, түннүктэргэ ититии үлэтэ ыытыллыбыт. Муостатын кытыыта көтүрүллэн, полистерол, изовер, линолеум тэлгэммит уонна көрүдүөр, остолобуой саалатын муостата керамогранитынан бүрүллүбүт. Бастакы этээс көрүдүөрүн, остолобуой үрдүн уонна иккис, үһүс этээскэ биэс үөрэнэр кылаас, психолог кабинетын, библиотека, аактабай саала үрдүлэрэ аныгылыы бүрүллүбүт, уоттарын ситимэ тардыллыбыт.

Спортивнай саалаҕа үгүс өрөмүөн барбыт, ону таһынан үс этээскэ барытыгар саҥа ааннар туруоруллубуттар, душтарга, туалеттарга саҥа раковиналар, унитазтар, илиини куурдар, уу сылытар аппараттар туруоруллубуттар. Муосталара, эркиннэрэ керамогранитынан бүрүллүбүт, сорох кабинеттарга линолеум тэлгэтиллибит.

Хас да сыл устата оскуола эркиннэрин силбэһэр арыттара уонна кырыыһата ардах-хаар уутуттан тэстэн эрэйдээбитэ. Быйыл ити кыһалҕа туоратылынна, итиэннэ кырыыһаттан түһэр хаары тутар анал тэрил тэлгэммит.

«Өрөмүөн, тутуу тиэндэрэ саас ыытыллар буолан, үбүлээһин, тутуу матырыйаалын кэлиитэ хойутуур. Өрөмүөн бара турбутун тухары бэрт элбэх, киһи хараҕар тута быраҕыллыбат, биллибэт-көстүбэт, симиэтэҕэ киирбэккэ хаалбыт мэһэйдэр көстөн, үлэ тэтимин атахтаатылар, үп-харчы да ороскуота эбиллибитэ. Ити үгүс кыһалҕаны туоруурга күүс-көмө буолбут, сүбэлээн-амалаан өйөөбүт улуус дьаһалтатын баһылыгар Е.М.Слепцовка уонна «Норд Инжиниринг» тутуу биригээдэтин үлэһиттэригэр истиҥ махталбын тиэрдэбин.

Тутааччылар эргэрбит эркин кырааскатын хастаан, истиэнэтин, муостатын хаһан, оскуоланы барытын саҥаттан тутар кэриэтэ үлэлээтилэр. Сөбүлэҥ быһыытынан «Норд Инжиниринг» үлэ барыта бүппүтүн кэннэ 6 ыйдаах мэктиэ биэрэр. Онон алтынньы 29 күнүгэр өрөмүөн үлэтэ түмүктэммитин туһунан акт туттарыстыбыт. Ити эрээри билигин сорох үлэ хайысхатыгар бэдэрээччит туруорбут ааннарын хаачыстыбатыгар, холлоҕосторугар, линолеум ыпсыыларыгар, спортивнай саала кырааскатыгар биһиги өттүбүтүттэн модьуйуу бэриллибитин туората сылдьаллар.

Оскуола тупсаҕай көстүүлээх, итии буоларыгар капитальнай өрөмүөнү ситэ ыытарга өссө да үгүс кэпсэтии, акт оҥоһулларыгар үлэ бара турар», — диэн оскуола дириэктэрэ К.А.Слепцова санаатын үллэстэр.

Ааптар: Светлана Талибаева.

This post was published on 24.11.2018 19:55 19:55