Орто Халыма бары нэһилиэктэригэр итиэннэ улуустааҕы гимназияҕа үөрэх бастакы модела, о.э. биир симиэнэҕэ очно үөрэнии тэриллиэ. Икки симиэнэнэн очно-заочно Орто Халыматааҕы орто оскуола үөрэнээччилэрэ үөрэниэхтэрэ. Манна сорох кылааска оҕо ахсаана 30 тиийэр. Оҕо саадтара үгэс быһыытынан үлэлиэхтэрэ. Улуус кылаабынай санитарнай бырааһын сүбэтинэн бөлөххө 15-тэн элбэх оҕо мустуо суохтаах. Ити биричиинэнэн саҥа иитиллээччилэри тохсунньуга диэри ылыы бобуулаах.
Үөрэх управлениетын салайааччы Александр Третьяков бүгүҥҥү күҥҥэ улууска 1251 үөрэнээччи баарын этэр. Маҥнайгы кылааска 124 оҕо барара былааннанар.
Үөрэх министиэристибэтэ сүбэлээбит моделларыттан Орто Халыма улууһа икки бэйэтигэр барсар көрүҥү талбыт. Бастакы модель — биир симиэнэҕэ очно үөрэнии. Улуус бары нэһилиэктэригэр аҕыйах ахсааннаах оскуолаларга итиэннэ улуустааҕы гимназияҕа үөрэх бастакы моделынан тэриллиэ.
Иккис модель — икки симиэнэнэн очно-заочно үөрэнии. Манна кылааска 15-тэн элбэх оҕо үөрэнэр оскуолалара киириэхтэрэ, о.э. Орто Халыматааҕы орто оскуола. Манна сорох кылааска оҕо ахсаана 30 тиийэр.
Оройуон бары оскуолаларыга 247 салгыны ыраастыыр тэриллэр наадалар. Олохтоох бүддьүөттэн маныаха 3 мөл 952 тыһ солк көрүлүннэ. Бастакы сүүс устуукка тэрили балаҕан ыйын 1 күнүгэр диэри «КОМПик» ХЭТ тиэрдиэ. Маны таһынан дезинфекциялыыр сириэстибэлэри ылыыга үп көрдөнөр.
Үөрэх дьылын көрсөр үөрүүлээх линиэйкэлэр улуус оскуолаларыгар үгэс быһыытынан барыахтара. Орто Халыматааҕы орто оскуолаҕа линиэйкэ бастакы уонна 11 кылаас үөрэнээччилэригэр эрэ тэриллиэ. Атын кылаас үөрэнээччилэрэ кылаас чааска мустуохтара.
ДЮСШ, «Спектр» айымньы киинэ, искусство оҕо киинэ хайдах үлэлииллэрэ билиҥҥитэ биллибэт.
Оҕо саадтара үгэс быһыытынан үлэлиэхтэрэ. Улуус кылаабынай санитарнай бырааһын сүбэтинэн бөлөххө 15-тэн элбэх оҕо мустуо суохтаах. Ити биричиинэнэн саҥа иитиллээччилэри тохсунньуга диэри ылыы бобуулаах.
