Орто Халыма Хатыҥнаагар үөр куба биир оҕотун дьоҥҥо хаалларан барбытын туһунан суруйан турабыт. Хатыҥчаана билигин Хатыҥнаахтан улуус киинигэр аҕалылынна.
Бүгүн, алтынньы 20 күнүгэр, Орто Халыма куоратыгар Хатыҥчаана 5 чаас устата бураанынан айаннаан кэллэ. Куба оҕотун нэһилиэк аҕа баһылыга Петр Сибиряков бэйэтэ көрөн-истэн аҕалла.
Хатыҥчаананы айылҕа харыстабылын инспекциятын үлэһиттэрэ көрүстүлэр уонна сылаас кыладыапкаҕа олохсуттулар. Сарсын бастакы самолетунан көтөрү «Орто дойду» зоопаркаҕа атаарыахтара.
Онон Хатыҥчаана салгыы олороругар кыах бэрилиннэ.
