Орто Халыматааҕы Иккис Хаҥалас нэһилиэгин Балаҕаннаах учаастагар сылгы сүөһүгэ лептоспироз сыстыганнаах ыарыы буллулар. Бу туһунан улуус ветеринарнай управлениета иһитиннэрдэ. Онон сибээстээн нэһилиэккэ карантин биллэрилиннэ. 


Өрөспүүбүлүкэтээҕи ветеринарнай-тургутар лаборатория Балаҕаннаах учаастак уон сылгы сүөһүтүнсыспай сиэллээҕин хааҥҥа аналиһын бэрэбиэркэлээбитин түмүгэр үс сылгыга лептоспироз ыарыы булулунна. Ыарыы тарҕамматын инниттэн учаастакка карантин биллэрэр туһунан ветеринария Саха сиринээҕи Департамена дьаһал таһаарда. Билигин сылгылары антибиотигынан эмтиир үлэ барар. Кинилэр турар сирдэригэр «Мирасан-F» эминэн дезинфекция ыытылынна.

Карантинынан сибээстээн сылгылары учаастактан таһаарыы эбэтэр учаастакка атыттары аҕалыы, ыалдьыбыттарыы өлөрүү бобулунна. Итини тэҥэ сылгы сүөһүлээх олохтоохторго сэрэтэр үлэ ыытылларыгар мэктиэлэннэ. Маннык ис хоһоонноох сурук Иккис Хаҥалас нэһилиэгин дьаһалтатыгар бэрилиннэ.

Аны үс ыйынан тустаах сылгылар хааннара Өрөспүүбүлүкэтээҕи ветеринарнай-тургутар лабораторияҕа анализка ыытыллыахтара.

Ааптар: Алена Кудрина, «Халыма долгуннара» хаһыат

0
0
comments powered by HyperComments