Алмаасэргиэнбаан “Орто Дойду” зоопаарканы кытта бииргэ муус устар 15 күнүгэр Бэдэр күнүн бэлиэтээтилэр. Бу күн Мохсоҕоллоохтооҕу оҕо киинин уонна “Берегиня” оҕо дьиэтин иитиллээччилэрин көрдөөх оонньууларынан, интэриэһинэй викториналарынан уонна бириистэринэн үөртүлэр.
“2016 сыллаахха Алмаасэргиэнбаан бу кыылларга дьиҥнээх эппэкиининэн буолбута, ити чиэһигэр “Орто Дойду” сиригэр-уотугар аан бастаан Бэдэр күнэ ыытыллыбыта, оттон бааҥҥа “Бэдэр” бырагыраама оҥоһуллубута”, — диэн АЭБ Уопсастыбаннаһы кытта сибээскэ бэрэстэбиитэлэ Наталья Миронова иһитиннэрдэ.
Кини этэринэн, зоопааркаҕа Илин Сибиир бэдэрдэрэ бааллар.
Тэрээһин үгэс курдук үһүс сылын ыытыллара кэрэхсэбиллээх. Алмаасэргиэнбаан бэйэтин үлэһиттэрэ аһымал көмөҕө туһуламмыт тэрээһиннэргэ кытталларын өйүүр. Регион сүрүн баана хаһыс да сылын “Выпускник”, “Хаарчаҕа суох оҕо саас”, “Бэдэр”, Корпоративнай волонтерство”, “Бэтэрээн” социальнай бырайыактары олоххо киллэрэр.
СИА.
