Саха сирин Ил Дарханын иһинэн олохтох салайыныы сэбиэтин мунньаҕар бары улуустар сайдыыларын стратегиятын анаан оҥорор наадатын туһунан кэпсэтии буолла. Тэрээһиҥҥэ Айсен Николаев, улуустар баһылыктара кытыннылар.

Үгүс оройуоннарга сайдыы стратегиятын оҥорбуттара. Өрөспүүбүлүкэ баһылыга докумуону оҥорууга ылсалларыгр сүбэлээтэ.

Өрөспүүбүлүкэ экэниэмикэтин миниистирин э.т. Майя Данилова этэринэн, 28 оройуоҥҥа уонна куораттарга стратегиялары оҥостоллоругар этиллибит, ол эрээри аҕыс эрэ улууска бигэргэммит: Мэҥэ Хаҥаласка, Мирнэйгэ, Нерюнгрига, Ньурбаҕа, Сунтаарга, Уус Маайаҕа, Эбээн Бытантайга уонна Дьокуускайга.

“Быыбар хампаанньатын кэмигэр 25 оройуоҥҥа сылдьыбытым, атыттарга чугастааҕы кэмҥэ тиийэ сылдьыам. Үгүс баһылыктар сөптөөх хайысханан баран иһэллэрин бэлиэтиибин. Чопчу оҥоһуллубут стратегиялар туһааннаах сиргэ-уокка былааннаан үлэлииргэ тирэх булуохтара”, — диэтэ Айсен Николаев.

Бүгүн өрөспүүбүлүкэ бырабыыталыстыбата Арассыйа бэрэсидьиэнэ Владимир Путин илии баттаабыт ыам ыйынааҕы ыйаахтарыгар суруллубут дойду сайдыытын стратегиятын соруктарыгар туһуламмт 2032 сылга диэри өрөспүүбүлүкэ сайдыытын стратегиятын чопчулааһыҥҥа үлэни саҕалаата.

“Баһылыктартан бэйэҕит муниципалитеттаргыт сайдыыларын соруктарын чопчулаан, бэйэҕит этиилэргитин киллэрэргитигэр көрдөһөбүн”, — диэн Айсен Николаев тоһоҕолоон бэлиэтээтэ.

0
0
comments powered by HyperComments