Саха сирэ “Ворлдскиллс” хамсааһыҥҥа 2013 с. саҕалаан кыттыспыта. Өскөтүн 2016 с. уон иккис, былырыын онус миэстэҕа тахсыбыт буоллахпытына, быйылгы күрэхтэһиигэ 20 миэстэ буолбуппут. “Ити, биир өттүнэн, эрэгийиэннэргэ профессиональнай үөрэхтээһин күүскэ сайдан эрэрин, күөн көрсүһүү таһыма үрдээбитин көрдөрөр. Онон биһиги оробуочай идэлэргэ үөрэтиибитин өссө күүһүрдэн биэрэрбит ирдэниллэр. Саха сиригэр оробуочай үөрэхтээһин элитата наада”, — диэн бэлиэтиир Айсен Николаев.
Онуоха орто, анал үөрэхтээһин саҥа үйэ таһымыгар эппиэттиэхтээхтэр. Колледжтар, техникумнар базаларын саҥардыы, хаҥатыы барыахтаах. Манна улахан хампаанньалар кыттыһаллара улахан оруоллаах. “Мин санаабар, “АЛРОСА”, “Сургутнефтегаз”, “Транснефть”, “Колмар” о.д.а. хампаанньалар оробуочай идэлэри баһылааһыҥҥа төһүү күүс буолуохтарын сөп. Колледжтар, техникумнар базаларыгар улахан дьон атын идэни баһылааһыннарыгар усулуобуйа баар буолуохтаах. Киһи сааһыттан тутулуга суох идэни баһылыахтаах, онно үөрэниэхтээх. Билигин предпринимательствоҕа, айти-технологияҕа, автоматизированнай производствоҕа идэтийии наада”, — диэн иһитиннэрэр Айсен Сергеевич.

Аграфена КУЗЬМИНА,  edersaas.ru