Атырдьах ыйын 3 күнүгэр тыа хаһаайыстыбатын миниистирин солбуйааччы Семен Потапов кэлэн тыа хаһаайыстыбатын нөҥүө тутулла турар эбийиэктэри көрөн, үлэни-хамнаһы кытары билсиһэн барда. Улуус баһылыгын бастакы солбуйааччы Андрей Неустроев, тыа хаһаайыстыбатын департаменын салайааччыта Александр Андреев туһааннаах эбийиэктэринэн сылдьан көрдөрдүлэр, туох-ханнык итэҕэстэр баалларын, хайдах быһыылаах көмө наадатын ыйдылар.
Ол курдук, Нам нэһилиэгэр «Нам» ХЭТ сакааһынан сүөһү астыыр буойуна тутуута түмүктэнэрэ эмиэ бэрт кыра кэм хаалбыт. Тутуу сүрүн үлэтэ бүтэн, билигин оборудованиетын туруоруу үлэтэ күүтүллэр. Ороһу нэһилиэгэр 120 ыанар ынахха аналлаах үүт блоктаах улахан саҥа хотон тутуллан, бу балаҕан ыйыгар күлүүһэ хаһаайыттарга, ол эбэтэр Владимир Павловка туттарыллыаҕа. 1 202,79 кв.м. иэннээх тутууга сакаас түһэрбит тэрилтэнэн «Туймаада» ФАПК буолар, оттон тендергэ кыайан бу үлэни ылбыт генеральнай бэдэрээччитинэн «Хаҥалас-Риэлти» ХЭТ үлэлиир. Бу туһунан бетонщик идэлээх Семен Иванов маннык кэпсээтэ: «Маннык типтээх хотоннор Аммаҕа, Чурапчыга, Хаҥаласка, Өлүөхүмэҕэ үлэлии тураллар. Бэтэрээ эҥээргэ Бүлүү улууһун Бөтүҥ нэһилиэгэр тутулла турар уонна бу Ороһу нэһилиэгэр. Үлэ көрүҥүттэн көрөн тус-туһунан биригээдэ кэлэн үлэлиир. Билигин ис истиэнэтэ оҥоһуллуоҕа, ититэр ситимин бэлэмнии сылдьабыт, муостата бетоннаныахтаах».
«Бу «Ороһу» кооперативка бөдөҥсүтүү бырагырааматыгар олоҕуран, үс КФХ уонна онно эбии аҕыйах сүөһүлээх чааһынай ыал киириэхтэрэ. Сүөһү ахсаанын 120 төбөҕө диэри тиэрдэр былааны тутуһан эһиил эбии сүөһү атыылаһыытыгар үлэлиэхпит. Быйылгы сылга кыстык от мөлтөҕүн учуоттаан, эбии от булунар үлэ барара күүтүллэр, онон быйыл маннык үлэ ыытыллара уустук буолуоҕа», — диэн Ороһу нэһилиэгин баһылыга Анатолий Антонов иһитиннэрдэ.
Маны таһынан миниистири солбуйааччы «Түгэхтэй» алааһыгар оҥоһуллуохтаах ипподром миэстэтин, ОДьКХ иһинэн үлэлии турбут, билигин Үөһээ Бүлүүтээҕи потребобщество дьаһайыытыгар бэриллиэхтээх водозабору, саҥа оборудованиены үлэҕэ киллэрээри турар пищевой кэмбинээти, маны таһынан саҥа тутуллуохтаах бэкээринэ акылаата түспүт миэстэтин, ону тэҥэ саахалланар туруктаах дьиэҕэ үлэлии турар бэкээринэни көрдө-иһиттэ.
«Намҥа убойнай сыаҕы тутууга, Ороһуга животноводческай комплекс тутуулара былаан быһыытынан баран иһэллэр. Болдьохтоммут кэмигэр тутуулары үлэҕэ киллэрэн туттарыахтара. Бу киһини үөрдэр үлэлэр. Бэкээринэ, ипподром, водозабор үлэлэрэ эһиилги сылга сөпкө бүтэр курдук быйыл саҕаланыахтарын наада. Миэстэтигэр кэлэн көрдүм, барыта үөрэтиллэ сылдьар бырайыактар, онон сметаларын оҥоһуннахтарына үбэ-харчыта чуолкай быһаарыллыаҕа. Быйыл үлэлэрэ саҕаланан, үлэҕэ киирэн, эһиилги Манчаары оонньууларын спартакиадатыгар бэлэм буолуохтаахтар. Пищевой комплекс боппуруоһа уустугун бары билэн олоробут, онон ыксатар эрэ кыахтаахпыт. «Туймаада-Лизинг» ситэриэхтээх үлэтин ситэрэн туттарыахтаах», — диэн Семен Семенович биир күннээх үлэтин маннык санаанан түмүктээтэ.
