Дьокуускай куорат полициятын дьуһуурунай чааһыгар биир дьахтар эрийэн, оптуобуска кумааһынньыгын уордарбытын туһунан иһитиннэрбит. 


Кини кэпсээбитинэн, «Октябрьскай» уонна «Туббольница» тохтобуллар икки ардыларыгар уоруйах кини кумааһынньыгын сойбоппут. Онно баанын каартата уонна харчыта бааллар эбит.

Дьокуускай полициятын холуобунай ирдэбилгэ управлениетын оперативниктара бу уорууга уорбаланааччыны туттулар. Урут сууттана сылдьыбыт, киин куорат үлэтэ суох 26 саастаах олохтооҕо эбит.

Оперативниктар быһаарбыттарынан, бу киһи өссө биир оптуобустан уорууга сыһыаннааҕа биллибит. Уорбут харчытын, биллэн турар, бэйэтин наадатыгар туттубут.

«Уоруу» ыстатыйанан холуобунай дьыала тэриллибит. Бу туһунан СӨ ИДьМ-тын пресс-сулууспата иһитиннэрдэ.

Дьон тоҕуоруһар, мустар сирдэригэр сэрэхтээх, болҕомтолоох буолуҥ! 

0
0
comments powered by HyperComments