Бу күннэргэ бэлиэтэниэхтээх урбаанньыттар идэлээх бырааһынньыктарынан сибээстээн, СӨ Ил Дархана Егор Борисов «Якутия» Кластер сайдыытын киинигэр оҥорон таһаарааччы урбаанньыттары кытта көрүстэ диэн edersaas.ru иhитиннэрэр.
Анал кииҥҥэ өрөспүүбүлүкэ улуустарыттан 50-тан тахса урбаанньыт үлэлиир. Көрсүһүү иннинэ Ил Дархан кластерга баар тэрилтэлэргэ сылдьан, балаһыанньаны билистэ. Ол курдук, аҕа баһылык аан бастаан «Кэрэ» ательеҕа сырытта.
Александра Колесова салайар ательетыгар 20 үлэһиттээх. 2011 сыллаахха «Бааһынай» ырыынагар 4 кв.м иэннээх хостон үлэтин саҕалаабыт тэрилтэ күн бүгүн Намҥа, Майаҕа уонна киин куоракка оҥорон таһаарар бородууксуйатын атыылыыр үс маҕаһыыннаах. Бу кластер иистэнэр сыаҕар тэрилтэ салалтата арендатыгар анал чэпчэтиинэн туһанар.
Ил Дархан Егор Борисов тэрилтэ үлэтин-хамнаһын, инники былаанын билистэ, үлэһиттэри кытта кэпсэттэ.
«Кластерга 2015 сыллаахха киирбиппит. Төһө да 100 кв. м тиийэ кэҥэттэрбит, билигин үлэһит ахсаана элбээн, үлэлиир технологиябытын саҥардан иһэр буолан, кыараҕас курдукпут. 100 киһи үлэлиир миэстэтин таһааран, саҥа үлэлиир сыах тутарга былаанныыбыт», — диэн кэпсиир Александра Саввична.
«Бастаан биирдиилээн сакаастары ылар ателье эбит буоллахпытына, билигин саха таҥаһын, оскуола оҕотун форматын, спортсменнар анал көстүүмнэрин тигэбит. Предпринимательство уонна инновация министиэристибэтин кытта ыкса сибээстээхтик үлэлиибит. Олохтоох оҥорон таһаарыыга «дорожнай картаҕа» киирбиппит», — диэн Ил Дарханы кытта көрсүһүүтүгэр үлэтин билиһиннэрдэ урбаанньыт.
Ателье кэнниттэн Ил Дархан маһы таҥастааччылары, миэбэли оҥорооччулары уонна дьиэ тутааччылары кытта көрүстэ. Бу салааҕа үлэлиир урбаанньыттар сыл аҥара куортамы төлөөбөттөр. Онтон салгыы кв. м. иһин отучча урбаанньыт 500 солк. уйунар.
Ил Дарханы кытта көрсүһүүгэ чэпчэтиинэн туһанар урбаанньыттар государствоттан өйөбүл көмө баарын бэлиэтээтилэр. Дьиэ тутааччылар аҕа быһылыкка дьиэ тутуутугар ханнык-туох ньыманы туһаналларын, тутуу маһын хантан аҕалалларын билиһиннэрдилэр.
Биирдиилээн урбаанньыттары кытта кэпсэтэригэр бородууксуйалара атыыга төһө барарын сураста. Холобура, ырыынакка 7 сыл үлэлиир киһи хараҕа халтарыйар миэбэллэрин оҥорон таһаарар «Мебелком» тэрилтэ дьон сакааһынан миэбэллэри оҥорор эбит да, салайааччы Маргарита Семенова кэпсииринэн, кэлиҥҥи кэмҥэ сакаас киириитэ аҕыйаабытын бэлиэтээтэ. Онуоха Ил Дархан: «Манна кэлэн сакаас биэрэллэрин кэтэһэн баран олорумаҥ. Араас ньыманы тобулан, сакаасчыттары бэйэҕитигэр тардыҥ. Маннык үчүгэй оҥоһуулаах дьиэ тээбириннэрин көрөн туран, ама, ким сакаастыа суоҕай?«, — диэн санатын тиэртэ. Кырдьыга да, оннук. Дьон маннык миэбэли оҥорон таһааралларын билбэккэ, уруккулуу санаанан бара үөрэммит сирдэриттэн миэбэли атыылаһаллара чахчы. Онон, мин биир бэйэм, олохтоох миэбэллэри дьон-сэргэ билиитигэр таһаарар уолдьаспыт диэн көрдүм.
Егор Борисовы кытта көрсүһүүгэ олохтоох оҥорон таһаарыыга үлэлэһэр урбаанньыттар сүрүннээн бэлэм оҥоһугу оҥорорго аналлаах матырыйаал суоҕун бэлиэтээтилэр.
Атын сиртэн аҕалар буолан, бородууксуйаларын сыанатын үрдэтэргэ күһэллэллэр. Урбаанньыттар санааларын истэн баран Ил Дархан: Бүгүн бэрт суолталаах кэпсэтии буолла. Ол түмүгэр нолуокка чэпчэтиини оҥорору өрөспүүбүлүкэ бюджетын сокуонугар көрүөхпүт уонна олохтоох бородууксуйаны оҥорон таһаарар дьоммутугар анал пуонданы тэрийэр туһунан кэпсэтиини ыытыахпыт, — диэн мунньаҕы түмүктээтэ.
Онон Ил Дарханы кытта көрсүһүүгэ урбаанньыттар киллэрбит этиилэрин түмэн, дьоҕус бизнеһинэн дьарыктанааччылар туруорсууларын тиһэн, тустаах министиэристибэ бэйэ бородууксуйатын оҥорон таһаарааччылары өйүүр үлэтин тосхолун оҥоруоҕа.
