РФ үөрэҕин уонна наукатын министиэристибэтэ көҕүлээһининэн, 2006 сылтан Саха сиригэр дойду үрдүк үөрэҕин кыһаларын биридимиэтинэн олимпиадалара ыытыллар. Бу сыллар тухары тустаах олимпиадаҕа 8980 оҕо кытынна. Кинилэртэн 2692 оҕо дойду ааттаах-суоллаах үрдүк үөрэҕин кыһаларыгар киирэр, үөрэнэр кыаҕы ылбыт.
Урутаан эттэххэ, олимпиада икки үчүгэй өрүттээх. Бастатан туран, тыа сирин оҕолоро кыттар кыахтаахтар. Иккиһинэн, бастыҥ көрдөрүүлээх оҕолор дойду үрдүк үөрэҕин кыһаларыгар быһаччы киирэргэ мэктиэ ылаллар. Онон төһө кыалларынан элбэх оҕо кыттарга дьулуһар.
Быйыл уопсайа аҕыс биридимиэккэ олимпиада ыытылынна. Кыттааччылары түөрт бөлөххө территориялынан араарбыттар. Ол курдук, кулун тутар бастакы аҥаарыгар хотугу улуустар оскуолаларыгар дистанционнай олимпиада ыытыллыбыт. Үлэлэрин хомуйан ылан, дойду араас үрдүк үөрэҕин кыһаларыттан кэлбит бэрэстэбиитэллэр бэрэбиэркэлээбиттэр. Хоту улуустартан 130 оҕо кыттыбытыттан, 95-һэ мэктиэлэммит.
Сунтаарга (Сунтаар, Бүлүү, Үөһээ Бүлүү, Ньурба, Ленскэй, Мииринэй, Өлүөхүмэ) буолбут олимпиадаҕа 192 кыттааччыттан, 137-тэ мэктиэлэммит.
Намҥа (Амма, Мэҥэ Хаҥалас, Чурапчы, Таатта, Томпо, Уус Алдан, Хаҥалас, Нам, Горнай, Уус Маайа, Кэбээйи) ыытыллыбыт олимпиадаҕа 317 оҕо киирбититтэн, 162 оҕо тус сыаллаах үөрэнии дуогабарыгар мэктиэлэммит. Онтон Дьокуускайга (Алдан, Нерюнгри, кэккэ биричиинэлэринэн улуустарыгар кыайан туттарбатах оҕолор) тэриллибит олимпиадаҕа 615 оҕо кыттыбытыттан, 212 оҕоҕо мэктиэлэммит.
СӨ үөрэҕин уонна наукатын миниистирин бастакы солбуйааччы Михаил Присяжнай олимпиада тыа сирин оҕото дойду тарбахха баттанар үөрэҕэр киирэригэр итиэннэ үлэ миэстэтин буларыгар кыах биэрэр диэн этэр. “Чопчу ханнык эрэ тэрилтэ исписэлиискэ наадыйарын туһунан биллэрэр. Министиэристибэ үрдүк үөрэҕи кытта үлэлэһэн, өрөспүүбүлүкэҕэ төннөн кэлэн үлэлиэн баҕарар оҕону куонкуруһунан үөрэххэ киллэрэр”, — диэн миниистири солбуйааччы быһаарар.
СӨ үөрэҕин уонна наукатын министиэристибэтин үрдүк үөрэххэ уонна тус сыаллаах (целевой) бэлэмнэниигэ салаатын салайааччыта Альберт Черкашин:“Олимпиада сорудаҕын анал хамыыһыйа бэлэмниир. Быйыл Ураллааҕы юридическай академияҕа, Сибиирдээҕи, Россиятааҕы медицинскэй университекка, Санкт-Петербурдааҕы сибээс уонна информационнай технология университетыгар куонкурус үрдүк.
Дуогабарынан үөрэнэ барбыт оҕолор үс сыл устата Саха сирин тэрилтэлэригэр үлэлиир эбээһинэстээхтэр. Ол оннугар өрөпүүбүлүкэ кинилэргэ социальнай көмө оҥорор. Өскөтүн үөрэхтэрэ төлөбүрдээх буоллаҕына төлүүр, айаннарын ороскуотун, олорор сирдэрин төлөбүрүн уйунар, стипендия биэрэр, биир кэмнээх материальнай көмө оҥорор. Үөрэхтэрин бырахпыт эбэтэр үлэ булбатах эдэр дьону кытта министиэристибэ күүскэ үлэлэһэр. Бүгүҥҥү күҥҥэ 3,5 мөл солк кэриҥэ суума өрөспүүбүлүкэ бүддьүөтүгэр төннөрүлүннэ”, — диэн иһитиннэрдэ.
Нам улууһун баһылыгын бастакы солбуйааччы Инна Сивцева: “Быйыл киин улуустар олимпиадалара Намҥа ыытылынна. Өскөтүн ааспыт сылга киин үөрэх кыһатыгар биһигиттэн 11 оҕо үөрэххэ киирбит эбит буоллаҕына, быйыл 77 оҕобут олимпиадаҕа кыттыбытыттан, 35 оҕо мэктиэлэннэ. Онон былырыыҥҥытааҕар киин куораттарга киирии өссө тупсарыгар эрэнэбит”, — диэн санаатын биллэрдэ.
Олимпиада кыттааччыларыгар анаан үлэ биэрээччилэр бэрэстэбиитэллэрин кытта көрсүһүү тэрийбиттэр. Инньэ гынан, оҕолор атах тэпсэн олорон, үгүс мунаарар боппуруостарыгар сиһилии хоруйдары ылбыттар.
