Ванкувер куоракка буолбут Олимпийскай оонньууларга чөмпүйүөннээбит, Сочи Оонньууларыгар үрүҥ көмүс мэтээли ылбыт Никита Крюков быйыл бэһис төгүлүн Арассыыйа хамаандатын састаабыгар киирэн Алдаҥҥа эрчиллэ сылдьар. Үрдүк таһымнаах тренердэргэ уонна дьарыктанарга табыгастаах усулуобуйаҕа тирэҕирэн Саха сирин хайыһардьыттарын спортка көрдөрүүлэрэ тупсарыгар кини бүк эрэллээх.
«Биһиги Алдаҥҥа дьарыкпытын өссө 2012 сыллаахха саҕалаабыппыт. Манна эрдэ хаар түһэрэ уонна муора таһымытан үрдүгэ дьарыктанарга олус табыгастаах. Ону таһынан Саха сирин бириэмэтэ Кореяны, Кытайы кытта сөп түбэһэр», — диэн Никита Крюков СИА-ҕа эттэ.
Крюков уонна Олимпиада бириистээх миэстэтигэр тиксибит Алексей Петухов уонна Александр Пажинский ый кэриҥэ Саха сирин спортсменнарын кытта дьарыктаннылар. Бу кэнниттэн кинилэр салгыы Италияҕа, оттон Финляндияҕа барыахтара. Манна аан дойду Кубогын бастакы түһүмэҕэ буолар.
«Аан дойду чөмпүйэнээтигэр кыттар туһугар Кубок үс бастыҥын иһигэр киирэр соруктаахпыт. Пхенчхан Олимпиадатыгар кыттар петевка «дьылҕата” быһаарылларыгар бу биир тутаах күрэхтэһии», —диир Крюков.
Өрөспүүбүлүкэ сүүмэрдэммит хамаандатын ыстаабыгар 18 чөмпүйүөнү иитэн таһаарбыт үтүөлээх тренер Николай Лопухов ананыытын биһириирин эттэ.
«Сахалар куһаҕана суохтук хайыһардыыллар. Тренердэрэ үчүгэйдэр, чуолаан Николай Лопухов. Мин Арассыыйа сүүмэрдэммит хамаандатыгар киирэн баран киниэхэ эрчиллэ сылдьыбытым. Кини элбэҕи биэрэр кыахтаах киһи. Хайыһардьыттар бэйэлэригэр эрэллээх буолалларыгар уонна улахан кирбиилэри ситиһэллэригэр баҕарабын», —диэтэ Никита Крюков.
