Россия президенэ Владимир Путин РФ правительствотыгар «Земский доктор» уонна «Сельский учитель» программаларынан Уһук Илиҥҥэ үлэлиир быраастарга уонна педагогтарга көрүллэр биир кэмнээх төлөбүр сууматын икки төгүл улаатыннарар туһунан соруйбута. Саха сирин вице-премьера Ольга Балабкина маннык миэрэ өрөспүүбүлүкэ тэйиччи сытар улуустарын кадрынан хааччыйыы боппуруоһун быһаарыыга көмөлөһүө. 


««Сельский учитель» уонна «Земский доктор» программалар Саха сиригэр олус көдьүүстээхтик үлэлииллэр. Бу программаларынан исписэлиистэр бастаан тыа сиригэр, онтон бөһүөлэктэргэ, кыра куораттарга тардыһыылара улаатар. Ол иһин бу хайысхаҕа ыытыллар политиканы өйүүбүт», — диэтэ Ольга Балабкина.

Саха сирин нэһилиэнньэлээх пууннарыгар исписэлиис тиийбэтэ баар буол, ордук быраастар. Онон вице-премьер этэринэн, дойду салалтатын өттүттэн сөптөөх миэрэлэри ылыы кадровай политиканы тупсарар. Холобур, 2012 — 2018 сылларга «Земский доктор» программанан тыа сиригэр, куорат тииптээх бөһүөлэктэргэ, кыра куораттарга (50 тыһ. дылы нэһилиэнньэлээх) 728 быраас, ол иһигэр сэлиэнньэлэргэ  — 602, бөһүөлэктэргэ — 107, кыра куораттарга — 19.

«Дьоҥҥо Хотугу тыйыс усулуобуйаҕа үлэлииргэ стимул наада. Онон бу быһаарыы Арктикаҕа уонна тэйиччи сытар нэһилиэнньэлээх пууннарга үөрэхтээх кадрынан хааччыйыыга өссө биир эбии көҕүлээһин буолар», — диэтэ Балабкина.

Санатар эбит буоллахха, Уһук Илиҥҥэ үлэлиир быраастарга уонна педагогтарга көрүллэр биир кэмнээх төлөбүр сууматын икки төгүл улаатыннарыы ахсынньы 1 күнүттэн саҕаланара былааннанар. Ол туһунан Владимир Путин правительствоҕа сорудаҕар суруллар.

Сигэн:

0
0

Хоруй суох