30 Кулун тутар 30.03
  • -16°
  • $ 92,37
  • 99,53

Ойуун Кулан аммаларга ис туруктарын иһиллэнэллэригэр сүбэлээтэ

11:16, 02 марта 2020
Текст:
Читайте нас на
Яндекс Новости
ЯДВ

Аммаҕа улуус олохтоохторун кытта саха биллэр ойууна Александр Артемьев – Кулан көрүстэ. Өйү-санааны сааһылааһын, майгыны-сигилини көрүнүү, түмсүүлээх буолуу туһунан көрүүлэрин, санааларын эттэ, арчылааһын, алгыс сиэрин-туомун ыытта.


Аммаҕа айылҕаттан айдарыылаах киэҥник биллэр саха ойууна Александр Артемьев – Кулан Амма улууһун баһылыгын Николай Архипов ыҥырыытынан олохтоохтору кытта көрүстэ.

 

Өйү-санааны сааһылааһын, майгыны-сигилини көрүнүү, түмсүүлээх буолуу туһунан көрүүлэрин, санааларын эттэ. Ис туруга күүстээх, кыахтаах уонна холку эрэ киһи олоҕун астына олорорун, билиҥҥи киһи үгүс кыһалҕата уонна ыарыылара кини санаатын, майгытын-сигилитин кытта сибээстээхтэрин, санааҕа ылларбыт киһи иһигэр бүгэн хааларын, айар-тутар күүһэ уостарын санатта. Хас биирдии киһи бэйэтин эйгэтин арыйан, аналын толорон, олоҕу астына, дуоһуйа олоруохтааҕын бэлиэтээтэ. Оҕотуттан оҕонньоругар диэри мустубут улуус олохтоохторо арчыланнылар, алгыс тылын иҥэриннилэр.

Александр Артемьев – Кулан, саха ойууна: “Аммаҕа уонна Бөтүҥ нэһилиэгэр нэһилиэнньэни кытта көрсүһүү түмүгүнэн көрдөххө, дьон билиҥҥи өйгө-санааҕа кэлбитэ харахха быраҕыллар. Киһи аймахха ис туруга улахан суолталаах.  Урут айылҕабытынан олорор кэммитигэр өй суолтата улахан этэ. Оттон билигин олохпут тутула уларыйан, ис кыах уонна эт-сиин мөлтөөн иһэллэр. Киһи хамсанар-имсэнэр дьиҥ олох эйгэтиттэн тэйэн, бэлэмҥэ сылааска олорон, санаа эйгэтигэр түргэнник ылларар. Онон хас биирдии киһи бэйэтин кэтэнэрэ, көрүнэрэ наада буолла. Бэйэтин бэйэтэ илиитигэр ылан арыллыахтаах”.

Елена Попова, “Сардаҥа” түмсүү чилиэнэ: “Кулан дьону кытта көрсөрүгэр хас биирдии саха киһитэ ис туругун иһиллэнэригэр, өйүн-санаатын сааһыланарыгар, этигэр-сиинигэр болҕомто уурарыгар сүбэлиир. Эр киһи олоххо оруола үрдүүрүгэр, дьахтар аймах тирэх буолуохтааҕын тоһоҕолоон этэр. Аныгы олох тэтиминэн саха оҕото, ыччата аһара куйаар ситиминэн үлүһүйбэккэ, айылҕатыттан тэйбэккэ, өбүгэлэртэн бэриллибит ис кыаҕын, дьоҕурун уһугуннарар кыахтаах, норуоппутун тыыннах хаалларар күлүүс буолар ийэ тылларын умнубаттарыгар ыҥырар. Саха тыла күүстээҕин, дириҥ ис хоһооннооҕун бэлиэтиир. Ийэ тылбытын үүнэр көлүөнэҕэ тириэрдэргэ хас биирдии дьиэ кэргэн, уһуйаан, оскуола, уопсастыба, тулалыыр эйгэ үлэлэһиэхтээх”.

 

Ааптар: Алтана Артемьева, https://ulus.media/2020/03/01/amma-a-saha-biller-ojuuna-kulan-uluus-olohtoohtorun-kytta-k-r-ste/

Следите за самым важным и интересным в Telegram-канале и WhatsApp-группе ЯСИА