Хаҥалас улууһун Ой нэһилиэгин олохтоохторо Валерий уонна Светлана Павловтар бэйэлэрэ олордубут виноградтарын амсайдылар. Бу туһунан Ulus.media суруйар.
Ыаллар оҕуруот аһын олордуунан аҕыйах сылтан бэттэх дьарыктаммыттар. «Сири кытта үлэлиир олус үчүгэй. Киһи сынньанар, уоскуйар«, — диир Валерий. «Үүнээйи киһини билэр, төһөннөн кинилэри кытары кэпсэтэҕин, кыһаллаҕын да, оччонон кинилэр үүнүүлэрэ өлгөм, минньигэс буолар«, — диир кини.
Паловтар үс тэпилииссэлээхтэр, биирдэрэ гааһынан сылытыллар. Тохсунньу бүтүүтэ биэрэһи, помидору, дьэдьэни олордоллор. Сыл устата сылаас тэпилииссэлэриттэн Валерий Викторовичтаах оҕурсуларын, помидордарын иккитэ усталлар. Павловтар оҕуруоттарын бэйэлэригэр анаан олордоллор.
Валерий Викторович тэпилииссэтин бэйэтэ туттубут. Үс хос бүрүөһүннээх тэпилииссэ (таһа пленка, иһэ – өстүөкүлэ, үрдэ армированнай бүрүөһүн) кыһыннары сылаас. Ол эрэн кыһын оҕуруот аһын үүннэрэр туһата суох – үүнээйилэргэ күн уота наада. Ууларын дьиэлэрин аннынааҕы күөлтэн носуоһунан хачайдыыллар уонна сылытан куталлар.
Быйыл Павловтар тэпилииссэлэригэр виноград сиппит.
«Урут оҕурсу, помидор олордуута сонун этэ. Билигин итинэн кими да сөхтөрбөккүн, оннооҕор арбуһу кирээдэҕэ аһаҕас халааҥҥа олордоҕун. Ол курдук, баҕар, аны уонча сылынан винограды олордуу күннээҕи көстүү буолуо«, — диир Валерий.
Икки сыллааҕыта Валерий Викторович виноградын Нам оҕуруотчутуттан Евдокия Степановаттан ылбыт. Үүнээйитин биэдэрэҕэ олордубут итиэннэ быйыл бастакы аһын ылбыт. Бэйэ олордуу виноградтара минньигэс, сүмэһиннээх буолтар.
