Томпо улууһун борокуратуурата сокуоннай саастарын ситэ илик оҕолор сокуону кэһиилэрин сэрэтии үлэтэ хайдаҕын бэрэбиэркэлээтэ.
Ол бэрэбиэркэ кэмигэр биллибитинэн, биир аҕа икки кыра оҕотун бэйэтэ иитэр эбит, ийэлэрэ төрөппүт буолар бырааба быһыллыбыт.
Иитэр да буолаахтаан — оҕолорун ончу көрбөт, бэйэлэрин соҕотохтуу хаалларан барар, сууйбат-тараабат, үчүгэйдик аһаппат-сиэппэт, дьиэлэрэ кирдээх-хохтоох эбит.
Ону ааһан, аҕа буолуохсут кырачааннары курунан, мас паалканан, төлөпүөнү ииттэрэр сунуурунан таһыйар адьынаттааҕа биллибит.
Борокуратуура бэрэбиэркэтин матырыйаалларыгар олоҕуран, силиэстийэ уорганнара РФ Холуобунай кодексатын 156-с ыстатыйатынан (“Төрөппүт кырыктаахтык сыһыаннаһан туран, оҕолорун иитэр эбээһинэһи толорбот буолуута») холуобунай дьыала тэрийбит.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн
