Ньурба улууһун Михаил Мегежекскэй аатынан Маалыкай орто агрооскуолата оҕо сайынҥы сынньалаҥ лааҕырын сыл аайы тэрийэн үлэлэппитэ быйыл лоп курдук 15 сылын туолла.
Лааҕыр үтүө үгэстэрин салҕаан, быйыл нэһилиэктэн 5 км тэйиччи Мондоку сиригэр «Кымыс» чэбдигирдэр оҕо сынньалаҥ киинин базатыгар 5 оҕо уопсастыбаннай түмсүүтэ сайыны быһа үлэлээтэ.
Маалыкай орто оскуолатын культурологияҕа учуутала, «Эрэл» оҕо тэрилтэтин салайааччыта Прасковья Яковлева иһитиннэрбитинэн, киин иһинэн «Кэрэ эйгэ» музыкальнай, «Дьоҕур» математическай, омук тылын дириҥэтэн үөрэтэр «Лингва» гуманитарнай, 5-с сылын үлэлиир «Эврика» научнай-чинчийэр, «Эрэл» спортивнай хайысхалаах биэс түмсүү оскуола оҕолорун интэриэстэринэн арааран үлэлэттилэр. Оскуола агрохайысхалаах буолан, кыһыннары оскуола остолобуойун оҕуруот аһынан хааччыйар «Арчы» оҕоруот аһын үүннэрэр лааҕыра – оскуола хорук тымыра. «Кулунчук» алын сүһүөх кылаас оҕолоругар аналлаах лааҕыр, быйыл үһүс сылын үлэлиир эрээри, “буорахтаах” түмсүү. Манна оскуола сылгыһыта Леонид Елегяев үлэлэһэр. Оттон кыраабылы кылбаҥнатар кыргыттардаах, кыдаманы кыыратар уолаттардаах «Маарыччаан» от лааҕыра өрүү холобурга сылдьар.
— Соторутааҕыта ыаллыы сытар Хатыы нэһилиэгиттэн «Хоһуун», «Лэкээ», «Үнүгэс» лааҕырдара Маалыкай бу ааттаммыт оҕо уопсастыбаннай түмсүүлэрин кытта «Быраһаай, дьикти түгэн!» сайыҥҥы лааҕырдар уокуруктааҕы слеттарыгар мустан аастылар. Манна оҕолор сайыны быһа туохха уһуйуллубуттарын көрдөрөн, оҕолорго сайыҥҥы сынньалаҥ, оттон учууталларга ситиһиилээх үлэ түмүгэ көһүннэ, – диэн «Эрэл» оҕо тэрилтэтин салайааччыта Прасковья Яковлева санаатын үллэһиннэ.
Бу курдук Маалыкай нэһилиэгинээҕи оҕо уопсастыбаннай түмсүүлэрэ учууталларын салалталарынан сайыннарын бэртээхэйдик атааран баран, үөрэ-көтө саҥа үөрэх дьылыгар үктэннилэр.
