29 Кулун тутар 29.03
  • -11°
  • $ 92,26
  • 99,71

Оҕо хамсааһына киллэрбит сокуонун барылын дьүүллэстилэр

16:48, 07 октября 2016
Читайте нас на
Яндекс Новости
ЯДВ

2015 с. «Дьулуур» оҕо биир сомоҕо хамсааһына оҕо уопсастыбаннай түмсүүлэрин туһунан Саха сирин сокуонун оҥорон киллэрэргэ быһаарыммыта. Ханнык да региоҥҥа ылылла илик сокуон барыла өйөннөҕүнэ уонна олоххо киирдэҕинэ, Саха сирэ маннык сокуону оҥорбут бастакы регионунан буолуохтаах.


Саха Өрөспүүбүлүкэтин вице-премьерэ Александр Соловьев бэрэссэдээтэллээх оробуочай бөлөх тэриллибитэ. Сокуон барылын өрөспүүбүлүкэ үрдүнэн киэҥ хабааннаахтык дьүүллэспиттэрэ. Чуолаан, балаҕан ыйын 9-10 күннэригэр Дьокуускай куоракка буолбут Бүтүн өрөспүүбүлүкэтээҕи ыччат уопсастыбаннай холбоһугун III сийиэһигэр кэпсэппиттэрэ. Съезд кыттыылаахтарын санаалара уонна этиилэрэ сокуон барылын оҥорорго учуоттаммыттара.

Алтынньы 6 күнүгэр СӨ Судаарыстыбаннай Мунньаҕар (Ил Түмэҥҥэ) «Саха Өрөспүүбүлүкэтигэр оҕо уопсастыбаннай хамсааһынын туһунан» сокуон барылын уопсастыбаннас дьүүллэстэ.

«Төгүрүк остуолу» Ил Түмэн дьиэ кэргэҥҥэ, оҕо аймахха, ыччат дьыалаларыгар, физическэй култуураҕа уонна спорка сис кэмитиэтин бэрэссэдээтэлэ Юрий Баишев салайан ыытта.

«СӨ оҕо уопсастыбаннай хамсааһынын туһунан» өрөспүүбүлүкэ сокуонун барылын СӨ ыччат дьыалаларыгар уонна дьиэ кэргэн бэлиитикэтигэр миниистирэ Афанасий Владимиров сиһилии билиһиннэрдэ. Кини сокуон барыла оҕону бары өттүнэн сайыннарыыга сөптөөх усулуобуйалар тэриллэллэригэр, оҕо уопсастыбаннай түмсүүлэрин уонна кинилэр салайааччыларын статустара бигэргэнэригэр, инники сайдыы тосхоллорун быһаарарга төһүү күүс буолуохтааҕын тоһоҕолоон бэлиэтээтэ. Сокуон барылыгар ураты болҕомто оҕо уопсастыбаннай хамсааһынын салайар исписэлиистэри бэлэмнээһиҥҥэ ууруллар.

«Дьулуур» оҕо биир сомоҕо хамсааһынын салайааччыта Геннадий Охлопков пионер кэминээҕи кэмнэр үтүө үгэстэрин салҕаан, оҕо уопсастыбаннай хамсааһынын саҥа таһымҥа таһаарарга дьулуһалларын бэлиэтээтэ. Оҕо уопсастыбаннай хамсааһына сайдарыгар бастакы уочараттаах эппиэтинэһи муниципальнай оройуоннар уонна куорат уокуруктара ылыахтаахтар.

Охлопков оскуолаларга оҕо хамсааһынын кабинеттара суоҕун, каадырдар уларыйа туралларын, эбиитин үлэһит штатын аччатыы буолла да, бастакы уочарат, кинилэр штаттара сарбылларын туһунан эттэ. Салайааччы 2018-2022 сс. судаарыстыбаннай бырагырааманы ылынарга оҕо түмсүүлэрин өйүүр хос бырагырааманы бэлэмнииргэ этии киллэрдэ.

Оҕо уопсастыбаннай түмсүүлэрэ судаарыстыбаттан үбүлэммэттэрэ, кинилэри өйүүргэ бэриллэр субсидия кээмэйэ сыл аайы кыччаан иһэрэ болҕомтоҕо ылылынна. Субсидиялар уонна граннар биир чопчу бырайыагы өйүүргэ эрэ, ону олоххо киллэрэргэ бэриллэллэр. Дьиҥэр, уопсастыба өр кэмнээх үбүлүһээни ирдиир үлэлэри сүрэҕин баҕатынан ыытан кэллэ.

«Төгүрүк остуолга» кыттыбыт Ил Түмэн депутаттара Александр Соловьев, Александр Уаров, Антонина Григорьева, Петр Аммосов, Алексей Филиппов Александр Сусоев, СӨ гражданскай уопсастыба институтун сайдыытын миниистирэ Сардаана Гурьева, СӨ Оҕо быраабын боломуочунайа Анна Соловьева, СӨ Ил Дарханын сүбэһитэ Туйаара Едисеева уо.д.а. сокуон барылыгар бэйэлэрин санааларын үллэһиннилэр, сокуон олоххо киирэрин өйүүллэрин биллэрдилэр.,

Дьүүллэһии түмүгүнэн «төгүрүк остуол» кыттыылаахтара мунньах резолюциятын ылыннылар. Сокуон барыла 2017 сыл бастакы кыбаарталыгар Ил Түмэн көрүүтүгэр киириэҕэ.

Ыспыраапка:

Ил Дархан Е.А.Борисов Ыйааҕынан, ахсынньы 5 күнэ Оҕо хамсааһынын күнүнэн бэлиэтэнэр.

Оҕо хамсааһынын сайыннарыыга СӨ Ил Дарханын иһинэн сэбиэт тэриллибитэ.

2017 с. «Дьулуур» оҕо хамсааһына 25 сылын туолар.

759 уопсастыбаннай холбоһук өрөспүүбүлүкэ 78 476 оҕотун хабан үлэлиир.

Следите за самым важным и интересным в Telegram-канале и WhatsApp-группе ЯСИА