29 Кулун тутар 29.03
  • -11°
  • $ 92,26
  • 99,71

Оҕо дьиэтин үлэһиттэрэ оҕоҕо хаҕыс сыһыан туһунан сураҕы утараллар

21:50, 22 марта 2016
Текст:
Читайте нас на
Яндекс Новости
ЯДВ

Бу күннэргэ Дьокуускайдааҕы оҕо дьиэтигэр үлэһиттэр оҕолору ороҥҥо кэлгийэллэрин курдук сурах тарҕанна. Ол эрээри, үлэһиттэр медицинскэй процедураны оҥорууга оҕо мөхсүбэтин, хамсаабатын туһугар икки оҕону ползуноктарыттан биирдэ ороҥҥо баайа сылдьыбыттарын туһунан эттилэр.

Доруобуйа харыстабылын миниистирин солбуйааччы Людмила Вербицкая уонна СИА устар бөлөҕө оҕо дьиэтигэр тиийэ сырыттылар. Үлэһиттэр тарҕаммыт иһитиннэриигэ этиллэр быһыыны-майгыны букатын утараллар. Сымыйа сураҕы биир үлэһит бэйэтин тус сыалы ситиһээри тарҕаппыт.

«Биһиги оҕолору хаһан да ороҥҥо кэлгийбэппит. Инбэлиит, күүрбүт икки оҕону оронтон үлтү түспэтиннэр диэн ползуноктарыттан ороҥҥо баайбыт биир түгэн баара. Ол кэлин хатыламматаҕа”, — диэтэ СИА-ҕа кылаабынай быраас э.т. Елена Бубякина.

Кини оҕолору баайталаабыт медсестра эппиэтинэскэ тардыллыбытын эбэн эттэ.

Бүгүҥҥү туругунан оҕо дьиэтэ 89 иитиллээччилээх. Оҕолор мөлтөх доруобуйалаах буоланнар, биир үксүн төрөппүттэрэ аккаастаналлар. Сылга ортотунан 200 оҕо бу дьиэҕэ кэлбит буоллаҕына, кинилэртэн 20% — эт-хаан, өй-санаа өттүнэн доруобай эрээри, төрөппүттэригэр наадата суохтар.

Сылга быһа холуйан 90 оҕону ийэтигэр, аҕатыгар төттөрү биэрэллэр, 30 оҕону туора дьон иитэ ылаллар. Атыттары 4 саастарын туолбуттарын кэннэ социальнай тэрилтэлэргэ биэрэллэр.

Ыарахан ыарыылаах оҕолор өр буолбаттар. Сорохтору төрүүр дьиэттэн быһа аҕалаллар, атыттары сокуоннай саастарын ситэ илик оҕолор дьыалаларынан дьарыктанар инспектордар, ардыгар ийэлэр бэйэлэрэ аҕалан биэрэллэр. Ыалдьар оҕолор үгүстэрэ мэйиилэригэр кэһиллиилээх, бэйэлэрэ кыайан тыыммат, хаампат-хамсаабат буолаллар. Оҕо дьиэтин үлэһиттэрэ кинилэри күннэри-түүннэри үс сменан солбуйса сылдьан көрөллөр-истэллэр.

Доруобуйа харыстабылын миниистирин солбуйааччы Людмила Вербицкая манна үлэлиир дьон дьыалаларыгар бэриниилээхтэрин, оҕолору таптыылларын, бары кэриэтэ 40-тахса сыл үтүө суобастаахтык үлэлии сылдьалларын ыйда. Төрүөхтэриттэн доруобуйалара мөлтөх оҕолору кытта үлэлиир ураты уопуттаахтарын ойуччу тутан эттэ. Ол да буоллар, министиэристибэ бэйэтэ тус ирдээн көрүүтүн ыытыаҕа. Оҕолорго хаҕыс сыһыан тахсыбыта бигэргэннэҕинэ, эппиэтинэстээх дьон, ол иһгэр салайааччы дуоһунастарыттан тохтотуллуохтара.

Следите за самым важным и интересным в Telegram-канале и WhatsApp-группе ЯСИА
Тутаах тыллар